اسلام آباد: وزارت خزانہ نے اپنی ماہانہ اکنامک اپ ڈیٹ اور آؤٹ لک رپورٹ جاری کردی ہے جس میں ملک کی اقتصادی صورتحال، سرمایہ کاری، برآمدات، ترسیلات زر اور مہنگائی کے رجحانات کا تفصیلی جائزہ پیش کیا گیا ہے۔

رپورٹ کے مطابق دسمبر 2025 میں مہنگائی کی شرح بڑھ کر 6.5 فیصد تک جاسکتی ہے۔ نومبر 2025 میں مہنگائی کی شرح 6.1 فیصد رہی جو گزشتہ سال نومبر 2024 میں 4.9 فیصد تھی۔

وزارت خزانہ نے کہا کہ جولائی سے نومبر کے درمیان سرمایہ کاری میں 25.3 فیصد کمی ہوئی جس کے باعث سرمایہ کاری کا حجم 93 کروڑ ڈالر تک محدود رہا۔

رپورٹ میں بتایا گیا ہے کہ پہلے پانچ ماہ میں برآمدات میں 3.2 فیصد کمی ریکارڈ کی گئی اور یہ 12.8 ارب ڈالر رہیں جب کہ ترسیلات زر میں 9.3 فیصد اضافہ ہوا اور یہ 16.14 ارب ڈالر تک پہنچ گئیں۔ درآمدات میں 11.1 فیصد اضافہ ریکارڈ ہوا جس سے حجم 25.6 ارب ڈالر تک پہنچ گیا۔

اقتصادی ماہرین کے مطابق صنعتی گروتھ کے اعداد و شمار پاکستان کی معیشت کے مستقبل کے لیے مثبت اشارے دیتے ہیں، خاص طور پر ٹیکسٹائل، گاڑیوں، سیمنٹ اور فوڈ پروسیسنگ کی صنعتوں میں بہتری دیکھی گئی ہے۔

موجودہ سال کے لیے کرنٹ اکاونٹ خسارہ مقررہ ہدف کے اندر رہنے کا امکان ہے اور پانچ ماہ میں کرنٹ اکاونٹ خسارہ کم ہوکر 81 کروڑ 20 لاکھ ڈالر رہا۔

وزارت خزانہ نے کہا کہ مالی نظم و ضبط اور بہتر گورننس کے اقدامات نے معاشی استحکام مضبوط کیا ہے۔ ڈیجیٹل اصلاحات نے بھی معاشی ترقی میں مدد فراہم کی ہے۔

رپورٹ میں مزید کہا گیا کہ بیرون ملک پاکستانیوں کی ترسیلات زر ملکی معیشت کو سہارا دے رہی ہیں جب کہ حکومتی اخراجات پر کنٹرول اور ٹیکس وصولی میں بہتری نے معاشی استحکام میں مثبت کردار ادا کیا ہے۔