جامشورو میں قومی شاہراہ ٹھٹہ روڈ پر تیز رفتار کار اور ڈمپر کے درمیان شدید تصادم کے نتیجے میں خاتون اور بچوں سمیت 8 افراد جاں بحق جبکہ 2 افراد زخمی ہوگئے۔
پولیس کے مطابق حادثہ تیز رفتاری کے باعث اوورٹیک کرتے ہوئے پیش آیا، حادثے میں شامل کار حیدرآباد سے ٹھٹہ جا رہی تھی اور تمام متاثرہ افراد کا تعلق حیدرآباد کے علاقے لطیف آباد زیل پارک سے بتایا جارہا ہے۔
حادثے کے بعد کار مکمل طور پر تباہ ہوگئی جبکہ کئی لاشیں گاڑی میں پھنس گئیں، جس کے باعث ریسکیو آپریشن میں شدید مشکلات پیش آئیں۔ ریسکیو اہلکاروں اور مقامی افراد نے کار کو کاٹ کر لاشیں اور زخمیوں کو نکالا۔
پولیس ترجمان کے مطابق جاں بحق ہونے والوں میں 2 مرد، 4 خواتین اور 2 بچے شامل ہیں جبکہ جاں بحق افراد میں ایک شخص کی شناخت عمران خان کے نام سے ہوئی ہے۔
حادثے میں زخمی ہونے والی ایک خاتون اور بچی کو تشویشناک حالت میں سول اسپتال حیدرآباد منتقل کر دیا گیا ہے۔
پولیس کا کہنا ہے کہ ڈمپر ڈرائیور موقع سے فرار ہوگیا، جس کی تلاش جاری ہے جبکہ واقعے کی مزید تحقیقات کی جا رہی ہیں۔
