عالمی جرائد نے نااہل مودی سرکار کی عوام میں خوف پھیلا کر بحران چھپانے کی سازش بے نقاب کردی۔

بھارت میں اس وقت  فضائی سلامتی اور قومی ایئرلائن کی مالی حالت بحران کی تصویر پیش کر رہی ہیں، جبکہ ناکامیوں سے عوام کی توجہ ہٹانے کے لیے خوف اور بم دھمکیوں کا بیانیہ بتدریج ایک مستقل حکمتِ عملی بنتا جا رہا ہے۔

 اے این آئی کے مطابق دہلی سے پونے کے لیے روانہ  انڈیگو پرواز کو پانچ دنوں میں دوسری بار ’’بم‘‘ کی  دھمکی موصول ہوئی، ایئر ٹریفک کنٹرول نے بم دھمکی کی اطلاع ایپرن کنٹرول کو دی، جس کے بعد طیارہ  آئسولیشن بے میں منتقل کیا گیا، جبکہ رواں ہفتے بھی انڈیگو کی پرواز کو اتوار کی صبح ایک سکیورٹی دھمکی کے بعد لکھنؤ منتقل کیا گیا تھا۔

دوسری جانب عالمی جریدہ بلومبرگ بھی گودی میڈیا کے پروپیگنڈا کی اصل کہانی منظر عام پر لے آیا۔

یہ بھی پڑھیں: وال اسٹریٹ جرنل کی مودی سرکار پر فردِ جرم، بھارت میں اقلیتیں عدم تحفظ کی علامت بن گئیں

بلومبرگ کی جانب سے ایئر انڈیا لمیٹڈ کارواں کو مالی سال میں ریکارڈ سالانہ خسارہ کا ہوشرُبا انکشاف کیا گیا ہے، جریدہ کے مطابق ایئر انڈیا کو مہلک حادثے کے بعد ریکارڈ 1.6 بلین ڈالر کے نقصانات کا سامنا کرنا پڑے گا، جبکہ جون میں ہوئے ڈریم لائنر حادثے میں 240 سے زائد افراد ہلاک ہو گئے تھے۔

بلومبرگ کے مطابق نقصانات میں مزید اضافہ پاکستان کے بھارتی ایئرلائنز کے لیے فضائی حدود بند کرنے کے باعث ہوا، پاکستان کی فضائی حدود  کی بندش سے ایئرلائنز کو یورپ اور امریکہ کے لیے طویل اور مہنگے راستے اختیار کرنے پڑے۔

بزنس انٹیلیجنس پلیٹ فارم ٹافلر کے مطابق ایئر انڈیا نے پچھلے تین سالوں میں 322.1 ارب روپے کا نقصان اٹھایا ہے۔

ماہرین کے مطابق بار بار بم دھمکیاں عوام کی توجہ حکومتی ناکامیوں سے ہٹانے کی منظم کوشش ہے، ایک ہی روٹس پر دھمکیاں بھارتی فضائی سکیورٹی کی کمزوری ظاہر کرتی ہیں، ایئر انڈیا کا خسارہ سیاسی مداخلت اور ناقص انتظام کا نتیجہ ہے۔

 ماہرین نے جون کے حادثے کو بھارتی ایوی ایشن میں سنگین حفاظتی ناکامی قرار دیتے ہوئے کہا کہ پاکستانی فضائی حدود کی بندش بھارتی ایئرلائنز کے اخراجات میں اضافے کا باعث ہے۔

بھارتی ایوی ایشن سیکٹر پہلے ہی تاخیر، منسوخ پروازوں اور انتظامی کشیدگی کا شکار تھا، اب ایک اور بڑی کمپنی خسارے کی دلدل میں جا گری ہے۔