اسلام آباد: وزارتِ خزانہ نے مالی سال 2026-27 کے وفاقی بجٹ کی تیاریوں کا باقاعدہ آغاز کر دیا ہے، جس کے لیے بجٹ سازی کے شیڈول کی منظوری دیتے ہوئے بجٹ کال سرکلر جاری کر دیا گیا ہے۔
سرکلر کے مطابق عبوری معاشی فریم ورک رواں ماہ کے دوران تیار کیا جائے گا جبکہ مڈ ایئر ریویو رپورٹ فروری 2026 میں قومی اسمبلی میں پیش کی جائے گی۔
وزارتِ خزانہ نے تمام متعلقہ وزارتوں اور ڈویژنز کو ہدایت کی ہے کہ وہ اہم بجٹ فارم، ریونیو اور اخراجات کے نظرثانی شدہ تخمینے بروقت جمع کرائیں جبکہ ترقیاتی منصوبوں کی تفصیلات 20 فروری تک فراہم کرنا لازم قرار دیا گیا ہے۔
بجٹ ریویو کمیٹی کے اجلاس 30 مارچ سے 12 اپریل 2026 کے دوران ہوں گے جبکہ ایکسچینج ریٹ سے متعلق معلومات 15 اپریل کو جاری کی جائیں گی۔ اسٹریٹجی پیپر کی منظوری 20 اپریل تک لی جائے گی۔
سرکلر کے مطابق کرنٹ اور ترقیاتی بجٹ کے لیے بجٹ سیلنگ 21 سے 25 اپریل کے دوران جاری کی جائے گی۔ سالانہ پلان کوآرڈینیشن کمیٹی کا اجلاس مئی کے پہلے ہفتے جبکہ قومی اقتصادی کونسل کا اجلاس مئی کے دوسرے ہفتے میں متوقع ہے۔
وزارتِ خزانہ نے ہدایت دی ہے کہ تمام بجٹ دستاویزات مئی کے آخر تک مکمل کر لی جائیں جبکہ سہ ماہی بجٹ تخمینے 30 جون تک جمع کرانا ہوں گے۔
