کراچی: آل پاکستان نیوز پیپرز سوسائٹی (اے پی این ایس) کی سالانہ جنرل کونسل کا اجلاس اے پی این ایس ہاؤس میں منعقد ہوا جس میں بلامقابلہ صدارتی انتخاب ہوا۔

اجلاس میں سوسائٹی کے 118 ارکان نے شرکت کی جس میں سردار سرمد علی کو بلامقابلہ صدر منتخب کیا گیا۔

اس کے علاوہ ناز آفرین سہگل لکھانی سینئر نائب صدر، شہاب زبیری نائب صدر، محمد اطہر قاضی سیکرٹری جنرل، محسن بلال جوائنٹ سیکرٹری اور نوید کاشف فنانس سیکرٹری منتخب ہوئے۔

اجلاس میں 2025-2026 کے لیے ایگزیکٹو کمیٹی کی رپورٹ اور سوسائٹی کے سالانہ اکاؤنٹس کو بھی منظوری دی گئی۔

پرنٹ میڈیا کے بحران پر تشویش

اجلاس میں ایک قرارداد منظور کی گئی جس میں موجودہ جغرافیائی سیاسی اور معاشی صورتحال کے باعث پرنٹ میڈیا پر گہری تشویش کا اظہار کیا گیا۔

قرارداد کے مطابق اس بحران کی وجہ سے اخبارات شدید مالی مشکلات کا شکار ہیں اور بہت سے اخبارات بند ہونے کے دہانے پر ہیں۔

اجلاس نے وفاقی حکومت سے مطالبہ کیا کہ وزیراعظم میاں شہباز شریف کے آخری دور میں منظور کردہ فیصلے پر عملدرآمد کرتے ہوئے سرکاری اشتہارات کی شرح میں اضافہ کیا جائے۔

ارکان نے وفاقی اور صوبائی حکومتوں سے اخبارات کے طویل عرصے سے زیر التوا بقایا جات ادا کرنے، اشتہارات کا حجم بڑھانے اور اشتہاری بجٹ میں پرنٹ میڈیا کے لیے علیحدہ حصہ مختص کرنے کا بھی مطالبہ کیا۔

انتخابات

اجلاس کے دوران ممتاز احمد کی سربراہی میں الیکشن کمیشن تشکیل دیا گیا تھا جس نے 2026-27 کے لیے ایگزیکٹو کمیٹی کے انتخابات کرائے۔ مختلف روزناموں اور جرائد کو بلا مقابلہ ایگزیکٹو کمیٹی کا حصہ منتخب کیا گیا۔

نئی ایگزیکٹو کمیٹی میں خواتین پبلشرز کی نشست پر زاہدہ عباسی منتخب ہوئیں۔ نئی منتخب ایگزیکٹو کمیٹی نے شفاف انتخابات کے انعقاد پر الیکشن کمیشن کی کارکردگی کو سراہا۔