وفاقی وزیر اطلاعات شبلی فراز کا کہنا ہے کہ  شہباز شریف احتساب سے بچنے کی کوشش کر رہے ہیں۔

 وفاقی وزیر اطلاعات سینیٹر شبلی فراز کی کابینہ اجلاس  پر بریفنگ  کے دوران اپوزیشن پر تنقید کرتے ہوئے کہنا تھا کہ  شہباز شریف  صاحب جوابات دینے کی بجائے الیکشن کا مطالبہ کر رہے ہیں۔

وفاقی وزیر اطلاعات نے کہا کہ  جس الیکشن میں ان کو اقتدار ملے وہ  ٹھیک  ہے،باقی سب غلط ہیں۔شوشے چھوڑنے سے شہباز شریف کی احتساب سے بچت نہیں ہوگی۔

اجلاس سے متعلق شبلی فراز نے بتایا کہ  وزیراعظم عمران خان  نے میڈیا ہاؤسز کے واجبات عید سے پہلے کرنے کی ہدایات کی ہے۔

وزیر اطلاعات ے بتایا کہ  اجلاس میں ماضی میں کی گئی غیر قانونی بھرتیوں پر رپورٹ     پیش کی  گئی ۔غیر قانونی بھرتیوں کی رپورٹ نہ دینے والی وزارتوں کو ایک ہفتے کا وقت دیا گیا ہے۔

شبلی فراز نے بتایا کہ کابینہ اجلاس میں زرعی شعبے کے لیے خصوصی پیکج کی منظوری دی گئی  ہے۔کھادوں  کی مد میں 37ارب روپے  کی سبسڈی دی جائے گی۔

انہوں نے مزید بتایا کہ زرعی قرضوں پر واجب الادا سود میں کمی کے لیے 9ارب روپے رکھے گئے ہیں۔کپاس  کے بیجوں کی فراہمی کے لیے 2ارب 30کروڑ روپے فراہم کیے جائیں گے جبکہ کپاس  کی فصل کو کیڑوں  سے محفوظ رکھنے  کے لیے ادویات کی مد میں 6ارب روپے مختص کیے گئے ہیں۔