ملازمت پر دیر سے پہچنا تو اکثر نوکری سے نکالے جانے سبب بنتا ہی ہے تاہم اسپین میں جلدی پہچنا بھی خاتون کے لیے برا ثابت ہوا اور اسے ملازمت سے فارغ کر دیا گیا۔
اسپین کے شہر الیکانٹے کی ڈیلیوری کمپنی میں ملازمت کرنیوالی خاتون روزانہ صبح 6:45 سے 7:00 بجے کے درمیان اپنے آفس پہنچ جایاکرتی تھی، حالانکہ خاتون اور ادارے کے درمیان طے ہونے والے معاہدے کے مطابق خاتون کی ملازمت صبح 7:30 بجے شروع ہونا تھی لیکن اس کے برعکس خاتون اپنے آفس کولیگ سے قبل ہی اپنی شفٹ کا آغاز کردیتی تھیں۔
یہی وہ عمل تھا جو اس کے مینیجر کے لیے ناگوار ثابت ہوا، خاتون کو اسی طرز عمل کی وجہ سے پہلی بار 2023 میں سرزنش کی گئی، تاہم انتظامیہ کی وارننگ کے باوجود وقت سے پہلے آنا جاری رکھا۔
جس کے بعد رواں برس خاتون کے باس نے تنگ آکر اس عمل کو ’ سنگین بدتمیزی ‘ قرار دیتے ہوئے ملازمت سے فارغ کردیا جس کے بعد خاتون نے اپنی کمپنی کیخلاف مقدمہ درج کروادیا۔
عدالت میں خاتون کے باس نے مؤقف اپنایا کہ خاتون کے جلدی آفس پہنچنے پر ان کے پاس کرنے کو کوئی کام موجود نہیں ہوتا لیکن اس کے باوجود وہ کمپنی کے ساتھ تعاون پر رضامند نہیں تھیں، بار بار دی گئی وارننگ کو نظر انداز کرتے ہوئے خاتون نے اپنے من مانی کی، خاتون کے اس عمل نے ان کے اور کمپنی کے تعلقات پر منفی اثر ڈالا جس کے بعد عدالت نے کمپنی کے حق میں فیصلہ دے دیا۔