مشیر وزیر اعلیٰ پنجاب برائے مالیاتی و ترقیاتی امور ڈاکٹر سلمان شاہ کا کہنا ہے کہ پاکستان  میں معاشی ترقی کے لیے چینی تجربات سے استفادے کے خواہش مند ہیں۔

مشیر وزیر اعلیٰ پنجاب برائے مالیاتی و ترقیاتی امور ڈاکٹر سلمان شاہ کی چینی سفیر یونگ جنگ کی قیادت میں چینی وفد سے ملاقات ہوئی ہے۔

ملاقات میں پنجاب میں پاک چائنا اکنامک کاریڈور کے حوالے سے جاری منصوبہ جات کی پیش رفت اور موجودہ حکومت کی ترجیحات پر تبادلہ خیال کیا گیا اور ڈاکٹر سلمان شاہ نے بتایا کہ حکومت پنجاب چینی اور مقامی سرمایہ کاروں کے مابین رابطہ کار کا کردار ادا کرے گی۔

ڈاکٹر سلمان شاہ نے بتایا کہ پچھلی حکومت کے ساتھ انفراسٹریکچر کے شعبہ میں کام کیا اب سی پیک کے تقاضے تبدیل ہو رہے ہیں اور اگلہ مرحلہ صنعتوں کے قیام کا ہے جبکہ پنجاب معاشی ترقی کے میدان میں قابل ستائش منصوبہ بندی کر رہا ہے۔

چینی وفد سے ملاقات میں مشیر وزیر اعلیٰ پنجاب برائے مالیاتی و ترقیاتی امور نے کہا کہ چین کے ساتھ زراعت، لائیوسٹاک، ٹیکسٹائل اورسولر انرجی پر کام کے لیے تیار ہیں تاہم اورنج لائن ٹرین پر کام مکمل کر چکے ہیں اور میٹروپروجیکٹ کو منافع کا ذریعہ بنانا چاہتے ہیں تاکہ اگلے فیز میں مشکلات پیش نہ آئیں۔

دوسری جانب کی چینی سفیر یونگ جنگ پنجاب کو دلچسپی کے تمام شعبہ جات میں معاونت فراہم کرنے کے لیے تیار ہیں۔

ڈاکٹر سلمان شاہ کا مزید کہنا تھا کہ صوبے میں معاشی ترقی کے لیے لانگ ٹرم منصوبہ بندی کر چکے ہیں اور سرمایہ کاروں کی آسانی کے لیے خصوصی صنعتی زونز قائم کر رہے ہیں۔