صارفین کی جیبوں پر اربوں روپے کا ڈاکہ ڈالا جارہا ہے، ایل پی جی کی قیمت میں ایک بار پھر غیر اعلانیہ اضافہ کردیا گیا ہے۔

ایل پی جی ڈسٹری بیوٹرز ایسوسی ایشن کے چیئرمین عرفان کھوکھر نے پریس بریفنگ دیتے ہوئے بتایا کہ گیس مافیا نے ایل پی جی مزید 20 روپے فی کلو مہنگی کر دی، گیس مافیا کی جانب سے قیمت میں روزانہ خود ساختہ اضافہ ہورہا ہے اور سرکاری ادارے خاموش تماشائی بنے ہوئے ہیں۔

انہوں نے کہا کہ منافع خوروں نے ایل پی جی کی قیمت میں 83 روپے فی کلو تک اضافہ کردیا ہے، بڑے شہروں میں ایل پی جی کی قیمت 260روپے فی کلو تک پہنچ گئی ہے۔

چیئرمین ایل پی جی ڈسٹری بیوٹرز نے کہا کہ گھریلو سلنڈر236 روپے اور کمرشل سلنڈر کی قیمت میں 908روپے اضافہ ہوا جبکہ گھریلو سلنڈر 3068 اور کمرشل سلنڈر 11800 روپے ہوگیا۔

عرفان کھوکھر نے کہا کہ شمالی علاقوں میں ایل پی جی 390روپے فی کلو ہو گئی جبکہ گھریلوسلنڈر 4600 روپے اور کمرشل سلنڈر 17706 روپے ہو گیا۔

انکا کہنا ہے کہ گیس مافیا غریب عوام کو لوٹنے میں مصروف ہے، حکومت بے بس نظر آرہی ہے، وزیر مملکت پیٹرولیم مصدق ملک ایل پی جی انڈسٹری کی تباہی کے ذمہ دار ہیں۔

انہوں نے کہا کہ ضلعی حکومتوں کو چاہیے کہ بڑھتی قیمت کو کنٹرول کریں ناکہ دکانداروں کی تذلیل کریں، پلانٹوں سے صارفین تک سرکاری قیمت پر سپلائی کو یقینی بنائیں۔

چیئرمین نے کہا کہ گیس کی مصنوعی قلت بنا کر اربوں روپے کی بلیک مارکیٹنگ جاری ہے، وزیر اعظم نے اوگرا کے نوٹس کے باوجود ایکشن نہ لیا، تمام پروڈیوسر و مارکیٹنگ کمپنیوں کی مکمل تحقیقات کی جائے، بلیک مارکیٹنگ میں ملوث کے خلاف کارروائی ہونی چاہیے۔

عرفان کھوکھر نے کہا کہ ایل پی جی کی سرکاری قیمت پر عدم دستیابی کی صورت میں 5 اور6 اگست ملک بھی میں ہڑتال ہوگی، ایل پی جی مارکیٹنگ کمپنی گیٹ پاس پر لازماً قیمت تحریر کریں۔

انہوں نے کہا کہ چیئرمین اوگرا اور ممبر گیس سے اس ضمن میں فوری کارروائی کا مطالبہ کرتا ہوں، اگر اس بلیک مارکیٹنگ پر قابو نہ پایا گیا تو آئندہ سردیوں میں گیس کی قیمتیں آسمانوں سے باتیں کرے گی۔

چیئرمین عرفان کھوکھر نے مزید کہا کہ سردیوں میں مزید قلت پیدا کی جائے گی جس کے باعث قیمتوں کو کنٹرول اور گیس کی دستیابی کو یقینی بنانا ناممکن ہو جائے گا۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں