اسلام آباد: وفاقی ادارہ شماریات نے ملک میں مہنگائی سے متعلق ہفتہ وار رپورٹ جاری کردی جس کے مطابق حالیہ ہفتے مہنگائی کی مجموعی شرح میں 0.64 فیصد کی کمی ریکارڈ کی گئی ہے۔
ادارہ شماریات نے بتایا کہ ہفتہ وار مہنگائی میں 0.64 فیصد کمی ہوئی جب کہ سالانہ بنیادوں پر ملک میں مہنگائی کی مجموعی شرح کم ہوکر 4 فیصد تک آگئی ہے۔
گزشتہ ہفتے کے دوران 13 ضروری اشیاء کی قیمتوں میں اضافہ ہوا، 15 اشیاء کی قیمتیں کم ہوئیں جب کہ 23 اشیاء کی قیمتوں میں استحکام دیکھا گیا۔
اعداد و شمار کے مطابق ایک ہفتے میں لہسن کی قیمت میں 1.86 فیصد اور کوکنگ آئل کی قیمت میں 1.54 فیصد اضافہ ہوا۔
اسی طرح انڈے 0.81 فیصد اور گھی 0.40 فیصد مہنگا ہوا۔ علاوہ ازیں کیلے، آٹا، ایل پی جی اور سگریٹس کی قیمتوں میں بھی اضافہ ریکارڈ کیا گیا۔
رپورٹ میں بتایا گیا ہے کہ حالیہ ہفتے ٹماٹر سب سے زیادہ سستے ہوئے جن کی قیمت میں 30.11 فیصد کمی دیکھی گئی۔
پیاز کی قیمت میں 12.41 فیصد جب کہ آلو کی قیمت میں 6.92 فیصد کمی ہوئی۔ اسی طرح چکن 4.46 فیصد اور چینی 3.31 فیصد سستی ہوئی۔
رپورٹ میں مزید بتایا گیا ہے کہ دال چنا، دال مسور، ڈیزل اور پیٹرول کی قیمتوں میں بھی کمی ریکارڈ کی گئی ہے۔
