کراچی: نومبر 2025 میں پاکستان میں کاروں کی فروخت میں 52 فیصد سالانہ اضافہ ریکارڈ کیا گیا جب کہ ماہانہ 11 فیصد کمی ریکارڈ ہوئی۔

پاکستان میں آٹوموبائل مارکیٹ میں نومبر 2025 کے دوران کاروں کی فروخت میں سالانہ 52 فیصد اضافہ ریکارڈ کیا گیا تاہم ماہانہ بنیاد پر فروخت میں 11 فیصد کمی دیکھی گئی۔

پاکستان آٹوموبائل مینوفیکچررز ایسوسی ایشن (پاما) کے مطابق نومبر میں ملک بھر میں کاروں کی فروخت 15,442 یونٹس تک پہنچ گئی۔

مالی سال 2025 کے پہلے پانچ ماہ کے دوران مجموعی فروخت 50,856 یونٹس تھی جب کہ مالی سال 2026 کے پانچ ماہ میں یہ 48 فیصد سالانہ بڑھ کر 75,000 یونٹس تک پہنچ گئی۔

اسی طرح 2 اور 3 پہیوں والی گاڑیوں کی فروخت میں بھی نومبر 2025 میں سالانہ 38 فیصد اضافہ ریکارڈ کیا گیا۔

نومبر کے مہینے میں 2 اور 3 پہیوں کی مجموعی فروخت 165,753  یونٹس رہی۔ مالی سال 2026 کے پہلے پانچ ماہ میں 2 اور 3 پہیوں کی فروخت میں 32 فیصد اضافہ ہوا اور یہ 763,351 یونٹس تک پہنچ گئی جب کہ مالی سال 2025 کے پانچ ماہ میں یہ فروخت 578,364 یونٹس تھی۔

پاما کا کہنا ہے کہ کار اور دو و تین پہیوں کی گاڑیوں کی فروخت میں نمایاں اضافہ ملک میں گاڑیوں کی بڑھتی ہوئی طلب اور صارفین کے اعتماد کی عکاسی کرتا ہے۔