ڈیووس: عالمی اقتصادی فورم (ڈبلیو ای ایف) کے موقع پر پاکستان پویلین میں منعقد ہونے والے ”انسپائرنگ پاکستان“ فورم نے پاکستان کی معاشی بحالی، اصلاحاتی سفر اور عالمی سطح پر بڑھتے ہوئے کردار کو نمایاں کردیا۔

پاتھ فائنڈر گروپ کے زیرِ اہتمام اس اعلیٰ سطحی فورم کا مقصد پاکستان کے بارے میں عالمی تاثر کو مثبت سمت میں تبدیل کرنا اور ملک کو ایک پُراعتماد، اصلاحات پر عمل پیرا اور سرمایہ کاری کے لیے پُرکشش منزل کے طور پر پیش کرنا تھا۔

فورم میں پاکستان کی معیشت میں جاری اصلاحات، سرمایہ کاری کے مواقع اور بدلتی ہوئی عالمی معیشت میں اس کی اسٹریٹجک اہمیت پر تفصیلی گفتگو کی گئی۔

کاروباری رہنما ضرار سہگل کی میزبانی میں ہونے والی اس تقریب میں ملکی و غیر ملکی ماہرین، سرمایہ کاروں اور پالیسی سازوں نے شرکت کی۔

شرکاء میں ایشیاپاک انویسٹمنٹس کے ایگزیکٹو چیئرمین سمیر چشتی، ڈاکٹر ہما بقائی، ڈاکٹر اُرس لسٹنبرگر، مائیکل کگل مین، ایڈم وائن اسٹین، ابو بکر، جان ڈی بلیزیو، آرسن ٹومسکی، ایئر کموڈور (ر) فرحان احمد، ایم۔ بلال لاکھلانی، محمد فرید عالم، ڈاکٹر سلمیٰ ملک، ڈاکٹر مارک سہگل، ہند الحنّاوی اور پاتھ فائنڈر گروپ کے کو چیئرمین اکرم سہگل شامل تھے، جنہوں نے اختتامی کلمات ادا کیے۔

فورم سے خطاب کرتے ہوئے سمیر چشتی نے پاکستان کے سرمایہ کاری ماحول پر مکمل اعتماد کا اظہار کیا اور کہا کہ ایشیاپاک انویسٹمنٹس پاکستان کے طویل المدتی معاشی امکانات کے حوالے سے نہایت پُرامید ہے۔

ان کا کہنا تھا کہ ہمارا اعتماد محض باتوں پر نہیں بلکہ ایک دہائی سے زائد عرصے میں پاکستان کے مختلف شعبوں اور صوبوں میں کی گئی عملی سرمایہ کاری پر مبنی ہے۔ ہم نے ملک بھر میں دس کمپنیوں کو کامیابی سے حاصل کیا اور چلایا جس سے یہ ثابت ہوتا ہے کہ پاکستان میں ہر سطح پر سرمایہ کاری کے مواقع موجود ہیں۔

سمیر چشتی نے بتایا کہ ایشیاپاک نے گزشتہ دس برسوں میں پاکستان میں 4 ارب ڈالر کی سرمایہ کاری کی ہے جب کہ آئندہ برسوں میں مزید 5 ارب ڈالر کی سرمایہ کاری کا منصوبہ بھی زیرِ غور ہے۔

انہوں نے اس اعتماد کی بنیاد حکومتی اصلاحات، مالی نظم و ضبط اور بہتر ہوتے ہوئے معاشی اشاریوں کو قرار دیا۔

فورم کے اختتام پر پاتھ فائنڈر گروپ کے کو چیئرمین اکرم سہگل نے کہا کہ پاکستان کا جغرافیائی محلِ وقوع اور نوجوان آبادی ملک کی پائیدار ترقی کے لیے ایک قیمتی اثاثہ ہیں جن سے درست پالیسیوں کے ذریعے بھرپور فائدہ اٹھایا جاسکتا ہے۔

اس فورم کا بنیادی مقصد غیر ملکی سرمایہ کاری کو راغب کرنا، روزگار کے مواقع پیدا کرنا اور پاکستان کی معیشت پر عالمی اعتماد کو مزید مضبوط بنانا ہے۔