اسلام آباد: ملک میں ہفتہ وار بنیادوں پر مہنگائی کی شرح میں 0.03 فیصد کی معمولی کمی ریکارڈ کی گئی ہے تاہم سالانہ بنیادوں پر مہنگائی بڑھنے کی رفتار 4.52 فیصد تک پہنچ گئی ہے۔

ادارہ شماریات پاکستان نے ہفتہ وار بنیادوں پر مہنگائی سے متعلق رپورٹ جاری کردی ہے جس کے مطابق گزشتہ ہفتے کے دوران 18 اشیائے ضروریہ کی قیمتوں میں اضافہ ریکارڈ کیا گیا جب کہ 9 اشیاء سستی ہوئیں اور 24 اشیاء کی قیمتیں مستحکم رہیں۔

گذشتہ ہفتے کے دوران ٹماٹر فی کلو 6 روپے 87 پیسے مہنگے ہوئے۔ اسی طرح ایل پی جی کے گھریلو سلنڈر کی قیمت میں 55 روپے 29 پیسے اضافہ ریکارڈ کیا گیا۔

چکن فی کلو 11 روپے سے زائد مہنگا ہوا جب کہ کیلے فی درجن 4 روپے 32 پیسے مہنگے ہوئے۔ دالوں کی قیمتوں میں بھی اضافہ دیکھا گیا، جہاں دال ماش فی کلو 6 روپے 41 پیسے اور دال چنا فی کلو 3 روپے 29 پیسے مہنگی ہوئی۔

رپورٹ میں بتایا گیا ہے کہ جلانے کی لکڑی، ویجیٹبل گھی، سگریٹ اور لہسن بھی مہنگی ہونے والی اشیاء میں شامل ہیں۔

دوسری جانب ایک ہفتے کے دوران9  اشیاء کی قیمتوں میں کمی بھی ریکارڈ کی گئی۔ رپورٹ کے مطابق آلو فی کلو 3 روپے 27 پیسے جب کہ پیاز فی کلو 4 روپے سے زائد سستے ہوئے۔

اسی طرح 20 کلو آٹے کے تھیلے کی قیمت میں 29 روپے 17 پیسے کمی ریکارڈ کی گئی۔ نمک، گڑ، چینی اور دال مسور کی قیمتوں میں بھی کمی دیکھنے میں آئی ہے۔

ادارہ شماریات نے مزید بتایا کہ گزشتہ ہفتے کے دوران بریڈ، تازہ دودھ، دہی سمیت 24 اشیاء کی قیمتیں مستحکم رہیں۔