پاکستان میں سونے کی قیمتیں آج تاریخی سطح تک پہنچ گئی ہیں، جس سے مارکیٹ میں ہلچل مچ گئی اور خریدار و سرمایہ کار حیران رہ گئے۔

آل پاکستان جمز اینڈ جیولرز ایسوسی ایشن (APGJA) کے مطابق سونے کی قیمت میں فی تولہ 14,800 روپے کا اضافہ ہوا ہے اور اب یہ 529,162 روپے فی تولہ ہو گئی ہے۔

اسی طرح، 10 گرام سونا بھی 12,689 روپے بڑھ کر 453,671 روپے میں دستیاب ہے۔ ماہرین کا کہنا ہے کہ گزشتہ مہینوں میں سونے کی قیمتوں میں مسلسل اضافہ دیکھنے میں آیا ہے اور آئندہ بھی قیمتیں بڑھنے کا امکان ہے۔

عالمی مارکیٹ میں بھی صورتحال پریشان کن ہے۔ سونے کی قیمت فی اونس $148 اضافے کے بعد $5,064 تک پہنچ گئی ہے۔

مزید پڑھیں: سونا، چاندی، بٹ کوائن اور تیل کی قیمتیں گرنے سے مارکیٹس ہل گئیں

ماہرین کے مطابق عالمی مہنگائی، اقتصادی غیر یقینی صورتحال اور کرنسی کے اتار چڑھاؤ کی وجہ سے مقامی مارکیٹ میں بھی قیمتوں میں مزید اضافہ متوقع ہے۔

چاندی کی قیمتوں میں بھی اضافہ دیکھنے میں آیا ہے۔ چاندی فی تولہ 109 روپے بڑھ کر 9,255 روپے ہو گئی جبکہ 10 گرام چاندی 93 روپے اضافے کے بعد 7,934 روپے میں دستیاب ہے۔

ماہرین کا کہنا ہے کہ مہنگائی کے بڑھتے رجحان کے سبب سونے اور چاندی دونوں کی قیمتوں میں مزید اضافہ ہو سکتا ہے۔