اسلام آباد: گوادر پورٹ اتھارٹی کالونی میں دہشت گردوں کے حملے کو ناکام بنانے والے شہداء کی نماز جنازہ ادا کر دی گئی۔

مسلح افواج کے شعبہ تعلقاتِ عامہ (آئی ایس پی آر) کے مطابق 20 مارچ کو گوادر پورٹ اتھارٹی کالونی میں دہشت گردوں کے حملے کو ناکام بناتے ہوئے جام شہادت نوش کرنے والے ڈیرہ غازی خان کے سپاہی بہار خان اور خیرپور کے سپاہی عمران علی کو مکمل فوجی اعزاز کے ساتھ ان کے آبائی علاقوں میں سپرد خاک کردیا گیا۔

نماز جنازہ میں شہداء کے عزیز و اقارب، پاک فوج کے جوانوں اور علاقے کے عمائدین نے شرکت کی۔

آئی ایس پی آر نے بتایا کہ 35 سالہ سپاہی بہار خان نے 2009 میں پاکستان آرمی میں شمولیت اختیار کی، انہوں نے سوگواران میں اہلیہ اور 3 بیٹے چھوڑے جبکہ 28 سالہ سپاہی عمران علی نے 2018 میں پاکستان آرمی میں شمولیت اختیار کی، انہوں نے سوگواران میں اہلیہ چھوڑی۔

ترجمان پاک فوج کا کہنا تھا کہ پاکستان کی مسلح افواج قوم کے شانہ بشانہ کھڑی ہے اور دہشتگردوں کی امن و استحکام کو سبوتاژ کرنے کی تمام کوششوں کو ناکام بنانے کے لئے پر عزم ہیں۔

آئی ایس پی آر نے مزید کہا کہ ہمارے بہادر بیٹوں کی یہ قربانیاں دہشت گردی کی لعنت کے خلاف لڑنے کے ہمارے عزم کو مضبوط کرتی ہیں، مادر وطن سے دہشت گردی کی لعنت کے خاتمے تک دہشت گردی کے خلاف جنگ جاری رہے گی۔

واضح رہے کہ دو روز قبل سیکیورٹی فورسز نے گوادر پورٹ اتھارٹی کمپلیکس پر بی ایل اے کا حملہ ناکام بنادیا تھا اور جوابی کارروائی میں 8 دہشت گرد ہلاک ہوگئے تھے۔