بالی ووڈ اداکار شاہ رخ خان کے بیٹے آریان خان اپنی 24 ویں سالگرہ کے موقع پر بھی نارکوٹکس کنٹرول بیورو (این سی بی) کے آفس پہنچ گئے ۔

آریان خان کی ویڈیو سوشل میڈیا پر وائرل ہوگئی ہے جس میں اُنہیں آفس کے اندر جاتے ہوئے دِکھایا جاسکتا ہے۔

آریان خان آج اپنی 24ویں سالگرہ منارہے ہیں لیکن اس کے باوجود بھی وہ آج ممبئی ہائی کورٹ کے حکم کے مطابق این سی بی کے آفس میں پیش ہوئے جہاں اُن سے ممبئی کروز شِپ منشیات کیس میں پوچھ گچھ کی گئی۔

دوسری جانب شاہ رخ خان کے بہت سے مداحوں کو اس بات پر دُکھ ہوا کہ آریان خان کو اپنی سالگرہ پر بھی این سی بی آفس جانا پڑا۔

یاد رہے کہ ممبئی ہائیکورٹ نے آریان کی ضمانت کے لئے 14 شرائط درج کی تھیں، آریان خان پولیس کو بتائے بغیر ممبئی نہیں چھوڑ سکتے اور انہیں ہر جمعے کو این سی بی کے سامنے پیش ہونا ہوگا۔

اگر شرائط میں سے کسی کی خلاف ورزی ہوتی ہے تو این سی بی آریان خان کی ضمانت کی منسوخی کی درخواست کر سکتا ہے۔

واضح رہے کہ گزشتہ ماہ 2 اکتوبر کو نارکوٹکس کنٹرول بیورو (این سی بی) کی جانب ممبئی کروز شِپ پر چھاپہ مارا گیا جہاں آریان خان کو اُن کے دوستوں سمیت منشیات استعمال کرنے کے الزام میں حراست میں لیا گیا تھا۔