پاکستان کی معروف اداکارہ حرا مانی کا کہنا ہے کہ جب کبھی اداس ہوں تو ہانیہ عامر کا انسٹاگرام دیکھ لیتی ہوں۔

حال ہی میں اداکارہ نے ایک نجی ٹی وی چینل سے خصوصی انٹرویو کے دوران کہا کہ میں نے بہت سے کردار نبھائے ہیں لیکن ڈرامہ سیریل ’کشف‘ میں کشف کا مرکزی کردار میرا پسندیدہ رہا ہے اس کردار کو نبھاکر  مجھے بہت مزہ آیا، مجھے سنجیدہ کردار کرنا زیادہ پسند ہیں۔

انٹرویو کے دوران اداکارہ  سے سوال کیا گیا کہ کیا ہمارے ناظرین ایسی کہانیاں دیکھنے کے عادی ہیں جو حقیقت سے زیادہ قریب ہوں؟

سوال کے جواب میں اداکارہ کا کہنا تھا کہ ناظرین  کے ہاتھ میں ریموٹ ہے اور ان کو پتہ ہے کہ انہیں کیا دیکھنا ہے،  میرا خیال ہے کہ اب ہماری آڈینس کچھ مختلف کچھ نیا دیکھنا چاہتی ہے، ناظرین ہمارا کام دیکھتے ہیں پسند کرتے ہیں اس کا مطلب ہے کہ وہ ہمیں دیکھنا چاہتے ہیں لیکن ہمیں ان کے مطابق کانٹینٹ بنانے میں شاید ابھی کچھ وقت لگے گا۔

دوران انٹرویو اداکارہ سے پوچھا گیا کہ سوشل میڈیا ہماری زندگی میں کیا فرق لاتا ہے؟

حرا مانی نے کہا کہ مجھے دوسروں کے انسٹاگرام اکاؤنٹس دیکھ کر اچھا لگتا ہے میں بہت انجوائے کرتی ہوں، جب کبھی اداس ہوتی ہوں تو ہانیہ عامر کا انسٹاگرام دیکھ لیتی ہوں وہ بہت فن کررہی ہوتی ہے اور یہ دیکھ کر میرا موڈ لائٹ ہوجاتا ہے۔

انہوں نے کہا کہ عائزہ اور دانش کا اکاؤنٹ دیکھتی ہوں تو ان دونوں کا ایک دوسرے کے لئے پیار بہت اچھا لگتا ہے جبکہ سجل کے کیپشنز بڑے شاعرانہ اور بڑے گہرے ہوتے ہیں جنہیں پڑھ کے اچھا لگتا ہے۔