جینیفر مستری بنسیوال، جو تارک مہتا کا الٹا چشمہ میں روشن دارو والا کور سوڈھی کا کردار ادا کرنے کے لیے مشہور ہیں، نے شو کے پروڈیوسر اسیت کمار مودی کے خلاف جنسی ہراسانی کا مقدمہ جیت لیا ہے۔

میڈیا رپورٹس کے مطابق مئی 2023 میں، جینیفر مستری نے شو کے پروڈیوسر آسیت کمار مودی کے خلاف کام کی جگہ پر مبینہ طور پر جنسی طور پر ہراساں کیے جانے کی شکایت درج کرائی تھی۔

اس حوالے سے جینیفر نے بتایا کہ “اسیت کمار مودی کو حکم دیا گیا ہے کہ وہ مجھے میری واجب الادا رقم ادا کریں اور جان بوجھ کر میری ادائیگی روکنے کے لیے ایک اضافی معاوضہ ادا کرے، جو کہ کل تقریباً 25-30 لاکھ روپے ہے۔ مسٹر مودی پر ہراساں کرنے پر 5 لاکھ روپے کا اضافی جرمانہ عائد کیا گیا ہے۔ “

انہوں نے انکشاف کیا کہ کیس کا فیصلہ 15 فروری کو سنایا گیا تھا تاہم انہیں میڈیا کے سامنے ظاہر نہ کرنے کو کہا گیا تھا۔

جینیفر نے مزید کہا کہ انہیں یہ نہیں لگتا کہ انہیں ابھی تک مناسب انصاف ملا ہے۔ “40 دن سے زیادہ ہو چکے ہیں، اور مجھے ابھی تک میری واجب الادا رقم نہیں ملی ہے۔ مسٹر مودی کو جنسی ہراسانی کا مجرم ثابت کرنے کے باوجود، تینوں ملزمان کو کوئی سزا نہیں دی گئی۔ فیصلے میں سہیل رمانی اور جتن بجاج کو شامل نہیں کیا گیا تھا ، جو مجھے مایوس کن ہے۔

انہوں نے بتایا کہ مقامی کمیٹی نے میری واجب الادا رقم کا حکم دیا، جس کی میں حقدار ہوں۔ یہ فیصلہ واضح کرتا ہے کہ میرا مقدمہ من گھڑت نہیں تھا، اور میں سستی پبلسٹی نہیں چاہتی تھی۔ اگرچہ مجھے خوشی ہے کہ میری ہراسانی کو تسلیم کیا گیا۔”