پاکستان شوبز انڈسٹری کی معروف و سینئر اداکارہ بشریٰ انصاری نے کہا ہے کہ مجھے ایک نیک سیرت شخص کے ساتھ زندگی گزارنے میں مزہ آ رہا ہے۔
حال ہی میں بشریٰ انصاری نے احسن خان سے یوٹیوب پر بات چیت کی، جس کی مختصر ویڈیو سوشل میڈیا پر وائرل ہوگئی۔
احسن خان نے اداکارہ سے نئی زندگی سے متعلق دریافت کیا، ان سے نئے شخص کے ساتھ زندگی گزارنے کے تجربے کا پوچھا تو بشریٰ انصاری نے اعتراف کیا کہ ان کی زندگی مزے میں گزر رہی ہے۔
انہوں نے شوہر کو ونڈرفل قرار دیتے ہوئے کہا کہ اس کا مطلب یہ نہیں ہے کہ وہ رات کو ڈانس پارٹیاں کرتے ہیں بلکہ وہ انتہائی نیک سیرت شخص ہیں۔
ان کا کہنا تھا کہ اگر وہ ان سے شادی نہ کرتیں تو وہ پانچ، چھ افراد کو ضرور آزماتیں، لیکن ان کے پاس کسی کو آزمانے اور کسی کو تلاش کرنے کا وقت بھی نہیں تھا اور یہ کہ تلاش کرنے سے کوئی اچھا شخص نہیں ملتا۔
بشریٰ انصاری نے کہا کہ تلاش کرنے سے صرف منحوس افراد ہی ملتے ہیں، اس لیے انہوں نے شوہر کو تلاش نہیں کیا تھا بلکہ وہ انہیں خود ہی مل گئے تھے۔
اداکارہ کا مزید کہنا تھا کہ اچھے شوہر کی شکل میں ایک طرح سے انہیں ان کی کسی نیکی کا اجر ملا ہے اور ان کے شوہر اچھی شخصیت کے مالک ہیں، ان کے ساتھ انہیں زندگی گزارنے میں مزہ آ رہا ہے۔
