پاکستانی ڈرامہ انڈسٹری کی مقبول جوڑی ماہرہ خان اور فواد خان ایک بار پھر مداحوں کی توجہ کا مرکز بن گئی ہے۔
دبئی میں ماہرہ خان اور فواد خان کی فلم نیلوفر کی پروموشن کے دوران ایک جذباتی لمحہ سامنے آیا، جس نے دونوں فنکاروں کے چاہنے والوں کو بھی متاثر کر دیا۔
ماہرہ اور فواد، جنہیں ڈرامہ ہمسفر کے بعد پاکستانی ٹی وی کی تاریخ کی خوبصورت ترین آن اسکرین جوڑی کہا جاتا ہے، یہ ایک بار پھر بڑے پردے پر جلوہ گر ہونے جا رہے ہیں، ان کی نئی فلم نیلوفر 28 نومبر 2025 کو ریلیز ہو گی اور اسی سلسلے میں دونوں فنکار فین میٹنگز اور میڈیا سیشنز میں مصروف ہیں۔
دبئی میں ہونے والے ایک ایونٹ کے دوران فواد خان نے جذباتی انداز میں اعتراف کیا کہ انہوں نے گزشتہ عرصے میں کچھ مشکل وقت گزارا ہے لیکن ان کے مداح ہمیشہ ان کے ساتھ کھڑے رہے۔
فواد نے کہا کہ وہ سوشل میڈیا پر بہت زیادہ فعال نہیں رہتے، اس لیے ہر بار شکریہ ادا نہیں کر پاتے، مگر وہ اپنے مداحوں کی محبت اور مستقل حمایت کے بے حد شکر گزار ہیں۔
فواد کی یہ باتیں سنتے ہی ماہرہ خان جذباتی ہوگئیں اور ان کی آنکھوں میں نمی آگئی، وہ اپنے دیرینہ ساتھی کی باتوں سے واضح طور پر متفق دکھائی دیں اور یہ لمحہ ان کی دوستی کی گہرائی کو ایک بار پھر سامنے لے آیا۔
ویڈیو سامنے آتے ہی سوشل میڈیا پر مداحوں کی جانب سے محبت بھرے پیغامات کی بھرمار ہو گئی۔ ایک صارف نے لکھا کہ انہیں یوں جذباتی ہوتا دیکھ کر دل بھر آیا جبکہ دوسرے نے کہا کہ فواد کے لیے بےحد محبت، یہ لمحہ واقعی خاص تھا۔
ایک اور مداح نے ماہرہ خان کے بارے میں لکھا کہ وہ حقیقی معنوں میں فواد خان کی سچی دوست ہیں، تاہم دونوں اسٹارز کی باہمی دوستی، احترام اور ایک دوسرے کے لیے خلوص نے ایک بار پھر مداحوں کے دل جیت لیے ہیں۔