معروف یوٹیوبر سعد الرحمان عرف ڈکی بھائی جوا ایپس کی تشہیر اور ترغیب کے مقدمے میں ضلع کچہری لاہور میں پیش ہوئے اور عدالت میں بیان حلفی جمع کروایا۔

بیان حلفی میں ڈکی بھائی نے کہا کہ ان کا یوٹیوب چینل ہی ان کا واحد ذریعہ معاش ہے، این سی سی آئی اے نے 17 ویڈیوز پر اعتراض کیا تھا لیکن وہ ان ویڈیوز کے ساتھ کسی قسم کی چھیڑ چھاڑ نہیں کریں گے۔

انہوں نے مزید کہا کہ ان 17 ویڈیوز کو نہ ڈیلیٹ کیا جائے گا اور نہ ایڈٹ کیا جائے گا، یوٹیوب چینل کی مین ایکسس نہ ہونے کے باعث مالی خسارہ کا سامنا ہے۔

بعد ازاں عدالت نے این سی سی آئی اے سے معاملے پر جواب طلب کر لیا۔

یاد رہے کہ ڈکی بھائی کو 17 اگست کو جوا ایپس کے ذریعے منی لانڈرنگ کے الزام میں لاہور ایئرپورٹ سے بیرون ملک جاتے ہوئے گرفتار کیا گیا تھا، جس کے بعد لاہور ہائیکورٹ نے 10 لاکھ روپے کے مچلکوں کے عوض ان کی درخواست ضمانت منظور کی اور انہیں 26 نومبر کو رہا کر دیا گیا تھا۔

ضمانت پر رہائی کے بعد ڈکی بھائی دوبارہ یوٹیوب پر واپس آئے اور حالیہ ویڈیو میں اپنے وی لاگ سے حاصل ہونے والی کمائی کے بارے میں کھل کر بات کی۔