پاکستان کی نامور اداکارہ صبا قمر پولیس کی وردی پہن کر ویڈیو بنانے کے معاملے پر قانونی پیچیدگی میں پھنس گئیں۔
اداکارہ کے خلاف پولیس یونیفارم میں ویڈیو شوٹ کروانے پر مقدمہ درج کرنے کی درخواست لاہور کی عدالت میں دائر کردی گئی ہے۔ اس درخواست پر ایڈیشنل سیشن جج الیاس ریحان نے سماعت کی۔
درخواست گزار وسیم زوار نے عدالت میں مؤقف اختیار کیا کہ سوشل میڈیا پر وائرل ویڈیو میں صبا قمر ڈریسنگ روم کے اندر پولیس یونیفارم میں نظر آ رہی ہیں اور انہوں نے ایس پی کا بیج بھی لگا رکھا ہے۔
View this post on Instagram
درخواست گزار کے مطابق قانون کے تحت پولیس یونیفارم پہننے سے قبل متعلقہ محکمے سے این او سی لینا لازمی ہوتا ہے، جس کی پاسداری نہیں کی گئی۔
درخواست میں مزید کہا گیا کہ اس حوالے سے تھانہ پرانی انارکلی میں مقدمہ درج کرانے کی درخواست دی گئی تھی، تاہم پولیس کی جانب سے کوئی کارروائی عمل میں نہیں لائی گئی، جس کے باعث عدالت سے رجوع کرنا پڑا۔
تاہم، عدالت نے ابتدائی سماعت کے بعد کیس کی مزید کارروائی 14 جنوری تک ملتوی کردی ہے۔
