سوشل میڈیا پر ہنگامہ ٹھنڈا پڑگیا، معروف اداکار فہد مصطفیٰ اور اداکارہ عتیقہ اوڈھو نے ایک دوسرے سے معذرت کرلی ہے۔
عتیقہ اوڈھو اور فہد مصطفیٰ کے درمیان حالیہ دنوں لفظی جنگ سوشل میڈیا پر خبروں کی زینت بنی رہی، تنازع اُس وقت شروع ہوا جب اداکارہ نے یہ تبصرہ کیا کہ فہد مصطفیٰ کو کم عمر لڑکیوں کے ساتھ اسکرین پر نظر آنے کے بجائے اپنی عمر کے قریب اداکاراؤں کا انتخاب کرنا چاہیے۔
اس بیان پر فہد مصطفیٰ برہم ہوگئے اور اپنے شو میں ردعمل دیتے ہوئے کہا کہ عتیقہ اوڈھو کو کیا مسئلہ ہے؟ کیا وہ تب ہی خوش ہوں گی جب ہم اُن کے ہیرو بنیں گے؟ ہم آپ کے ساتھ اُس وقت ہیرو بن کر آئیں گے جب آپ 2، 4 کاسمیٹک سرجریز کروا لیں گی۔
View this post on Instagram
معاملہ اُس وقت مزید بڑھ گیا جب عتیقہ اوڈھو نے اپنے انسٹاگرام اکاؤنٹ پر کہا کہ فہد مصطفیٰ نے اس لیے ایسا ردعمل دیا کیونکہ اُنہیں میری بات بری لگی جبکہ فہد مصطفیٰ کے سخت لہجے پر سوشل میڈیا صارفین کی بڑی تعداد نے عتیقہ اوڈھو کی حمایت بھی کی۔
اب عتیقہ اوڈھو نے باضابطہ اور نہایت شائستگی کے ساتھ فہد مصطفیٰ سے معذرت کرلی ہے اور سوشل میڈیا صارفین سے اپیل کی ہے کہ اس معاملے کو مزید نہ بڑھایا جائے۔
دوسری جانب اپنے شو کے دوران فہد مصطفیٰ نے بھی عتیقہ اوڈھو سے معذرت کرلی ہے، جس کے بعد سوشل میڈیا صارفین دونوں اداکاروں کے اس باوقار اور دل کو چھو لینے والے اقدام کو سراہا رہے ہیں۔
View this post on Instagram
