پاکستانی یوٹیوبر ذوالقرنین سکندر اور رجب بٹ کے درمیان جاری تنازع نے نیا رخ اختیار کر لیا ہے، جہاں ذوالقرنین سکندر نے حالیہ بیان میں اپنے مؤقف کی وضاحت کرتے ہوئے مختلف دعوے سامنے رکھے ہیں۔
ذوالقرنین سکندر، جو عام طور پر تنازعات سے دور رہتے ہیں اور اپنی اہلیہ کنول آفتاب کے ساتھ فیملی ولاگز کے لیے جانے جاتے ہیں، اس بار کھل کر سامنے آئے۔
ان کا کہنا تھا کہ میں عموماً کسی کے خلاف بات نہیں کرتا، تاہم موجودہ صورتحال نے مجھے وضاحت دینے پر مجبور کردیا ہے۔
یہ معاملہ اس وقت نمایاں ہوا جب رجب بٹ کی جانب سے مبینہ طور پر کنول آفتاب سے متعلق تنقیدی بیان سامنے آیا، جس کے بعد ذوالقرنین سکندر نے ردعمل دیا اور اپنے بیان میں رجب بٹ کے کیریئر کے حوالے سے مختلف دعوے کیے اور کہا کہ ماضی میں انہیں مختلف مواقع فراہم کیے گئے۔
View this post on Instagram
ذوالقرنین سکندر نے کہا کہ میں اور میری اہلیہ نے رجب بٹ کو آن لائن پلیٹ فارمز پر متعارف کروانے، شاؤٹ آؤٹس دینے اور دیگر مواقع فراہم کرنے میں کردار ادا کیا اور مختلف مواقع پر تعاون اور رہنمائی فراہم کی گئی۔
اپنے مؤقف کے حق میں ذوالقرنین سکندر نے دعویٰ کیا کہ میرے پاس اپنے بیانات سے متعلق شواہد موجود ہیں، جن میں پیغامات اور دیگر مواد شامل ہیں۔ تاہم، ان دعوؤں پر رجب بٹ کی جانب سے باضابطہ ردعمل سامنے نہیں آیا۔
یہ تنازع سوشل میڈیا پر زیرِ بحث ہے، جہاں صارفین دونوں جانب کے مؤقف پر مختلف آراء کا اظہار کر رہے ہیں جبکہ معاملے کی مزید پیش رفت پر بھی نظر رکھی جا رہی ہے۔
