معاون خصوصی ڈاکٹر فردوس عاشق اعوان نے کہا ہے کہ کورونا وائرس صرف ہمارے لئے نہیں بلکہ یہ ایک عالمی چیلنج ہے جس کا ہم سب کو مضبوطی سے سامنا کرنا ہے۔

تفصیلات کے مطابق پاکستان کے سرکاری نشریاتی ادارے سے بات کرتے ہوئے ڈاکٹر فردوس نے کورونا وائرس کے متعلق کہا ہے کہ وزیراعظم عمران خان نے چین میں پاکستانی طلباء کی دیکھ بھال کے احکامات دیئے تھے، چین کے بعد دوسرے ہمسایہ ملک ایران میں بھی  کوورنا کیسز کی اطلاعات ملی تھیں لیکن چین میں وائرس پھیلنے کے بعد حکومت نے اقدامات شروع کر دیئے تھے۔

انہوں نے کہا کہ وزیراعظم سارے عمل کی خود نگرانی کر رہے ہیں جبکہ عالمی ادارہ صحت کی جانب سے بھی حکومت کے پیشگی اقدامات کی تعریف کی گئی تھی۔

انہوں نے مزید کہا کہ تفتان میں قرنطینہ سینٹر میں زائرین کو ہر ممکن سہولتیں فراہم کی گئیں جبکہ پاک فوج اور سکیورٹی اداروں نے زائرین  کی سہولتوں کے لئے ہر ممکن تعاون کیا۔

اس موقع پر انہوں نے بتایا کہ اپوزیشن کورونا وائرس کے مسئلے پر اپنی سیاست چمکا رہی ہے، کورونا وائرس پر خواجہ آصف کے بیانات کی شدید مذمت کرتی ہوں کیونکہ حکومت پہلے دن سے کورونا وائرس سے نمٹنے کیلئے اقدامات کر رہی ہے۔

ڈاکٹر فردوس نے کہا کہ کورونا وائرس سے نمٹنے کے لئے صوبوں کی تجاویز پر وفاقی حکومت عمل کرے گی۔

انہوں نے بتایا کہ وائرس سے متاثرہ  زیادہ تر لوگ صحت یاب ہو جاتے ہیں لیکن وائرس سے عمر رسیدہ اور پہلے سے کسی  بیماری میں مبتلا لوگ زیادہ متاثر ہو رہے ہیں، ترقی یافتہ ممالک بھی وباء سے محفوظ نہیں رہے ہیں کیونکہ ترقی یافتہ ممالک کے پاس بھی سکریننگ کا مکمل نظام موجود نہیں ہے لیکن وفاق مسافروں کی سکریننگ اور فنڈز کی ہر ممکن فراہمی یقینی بنا رہے ہیں۔