ڈاکٹرز نے کہا ہے کہ ملک بھر میں لاک ڈاؤن میں عوامی اجتماعات پر سختی ہونی چاہیئے۔

تفصیلات کے مطابق گلگت میں ڈاکٹرز اور پیرامیڈیکل سٹاف نے مشترکہ نیوز کانفرنس کرتے ہوئے کہا کہ ڈاکٹرز اور پیرامیڈیکس کورونا وائرس سے اول دستے کے طور پر لڑ رہا ہے۔

ڈاکٹرز کا کہنا تھا کہ ہم عوام کی خدمت کیلئے اپنی جان کی قربانی سے بھی دریغ نہیں کریں گے لیکن وائرس سے لوگوں کو محفوظ رکھنے کیلئے لاک ڈاون کو مذید سخت کرنے کی ضرورت ہے۔

انہوں نے کہا ہے کہ عوامی اجتماعات پر سختی سے پابندی ہونی چاہیے کیونکہ لاک ڈاون کے باوجود شہر  میں لوگوں رش بدستور بڑھ رہا ہے اور  مذید سختی نہ کی گئی تو حالات بگڑ سکتے ہیں۔

مساجد کو بند کیا جائے، لاک ڈاؤن مزید سخت کیا جائے، ڈاکٹرز

پریس کانفرنس میں ڈاکٹرز کا کہنا تھا کہ ڈاکٹرز اور پیرامیڈیکل سٹاف کی مسائل فوری حل کئے جائے اور ڈاکٹرز اور محکمہ صحت کے تمام ملازمین کی تنخواہوں میں کٹوتی نہ کی جائے۔

انہوں نے مزید کہا کہ ایک ماہ کی اضافی تنخواہ متعلقہ ادارے کے تمام سٹاف کو دی جائے اور گلگت،بلتستان اور دیامرمیں ریپڈ پی سی آر مشینیں نصب کی جائیں۔

ڈاکٹرز کا کہنا تھا کہ وائرس سے محفوظ رہنے کیلئے ہر ایک اپنا کردار ادا کرنا ہوگا۔

یاد رہے کہ اس سے قبل کراچی پریس کلب میں میڈیا نمائندگان سے گفتگو کرتے ہوئے ڈاکٹر قیصر سجاد کا کہنا تھا کہ بہت سارے لوگ کرونا وائرس کو مذاق سمجھ رہے ہیں، شہر میں دکانیں کھلی ہوئی ہیں جس پرکوئی توجہ نہیں دی جارہی، عوام اور حکمرانوں کو یہ سمجھنا ہوگا کہ ہمارے پاس اسپتالوں میں جگہ موجود نہیں ہے، پاکستان کا شعبہ صحت بہت کمزور ہے۔

اُن کا کہنا تھا کہ حکمرانوں سے پہلے بھی کئی مہلک بیماریاں نہیں سنبھالی گئیں، 14اپریل سے لاک ڈاؤن میں نرمی آتے ہی مریضوں میں اضافہ ہوگیا، عوام سمیت تمام مکاتب فکر کو وبا پر کنٹرول کرنے کے لیے اپنا تعاون پیش کرنا ہوگا۔