اس وقت ڈپریشن دنیا میں تیزی سے پھیلنے والے امراض میں شامل ہے، جس نے تمام طبی ماہرین کو مشکل میں ڈالا ہوا ہے۔
ایسے میں طبی ماہرین ڈپریشن کے پائیدار علاج کے لیے ڈپریشن کی بنیادی وجہ کی تلاش میں مصروف ہیں، اور روز نت نئے تجربات کر رہے ہیں۔
اب تک طبی ماہرین یہ جاننے میں ناکام رہے ہیں کہ لوگوں کو اس بیماری کا سامنا کیوں ہوتا ہے۔مگر اب انہوں نے ایک اہم ممکنہ وجہ کو دریافت کیا ہے۔
مزید پڑھیں: روحانی تسکین اور لوگوں کی مدد نے ڈپریشن سے نکلنے میں مدد کی، ماہرہ خان
چین میں ہونے والی ایک طبی تحقیق میں دماغی توانائی میں کمی کو ڈپریشن کی ممکنہ وجہ کے طور پر پیش کیا گیا ہے۔
سدرن میڈیکل یونیورسٹی کی اس تحقیق میں چوہوں پر تجربات کیے گئے اور دیکھا گیا کہ adenosine triphosphate (اے ٹی پی) نامی مرکبات کے سگنل ڈپریشن اور انزائٹی پر کس طرح اثر انداز ہوتے ہیں۔
اے ٹی پی خلیات کو توانائی فراہم کرنے والا اہم ذریعہ مانے جاتے ہیں جبکہ یہ اعصاب کے باہمی رابطوں کے لیے ایک کیمیائی میسنجر کا کردار بھی ادا کرتے ہیں۔
تحقیق میں دریافت کیا گیا کہ طویل المعیاد تناؤ سے اے ٹی پی کی سطح گھٹ گئی اور چوہوں میں ڈپریشن اور انزائٹی جیسی علامات پیدا ہوگئیں۔
محققین نے پھر جائزہ لیا کہ اے ٹی پی کا اخراج کم ہونے سے مزاج پر کیا اثرات مرتب ہوتے ہیں۔
انہوں نے جینیاتی طور پر اے ٹی پی کا اخراج کم کیا تو چوہوں میں ڈپریشن اور انزائٹی سے متعلق علامات نمایاں ہوگئیں۔
مزید پڑھیں: کیا سرسبز مقامات کی سیر ڈپریشن کو کم کر سکتی ہے؟
انہوں نے بتایا کہ یہ اولین راہ راست شواہد ہیں جن سے ثابت ہوتا ہے کہ اے ٹی پی کا اخراج ڈپریشن اور انزائٹی پر اثرانداز ہوتا ہے۔
ان کا کہنا تھا کہ ڈپریشن اور انزائٹی اکثر بیک وقت آپ کو شکار بناتے ہیں اور اکثر تشخیص تاخیر سے ہوتی ہے۔
اس تحقیق کے نتائج جرنل آف نیورو سائنس میں شائع ہوئے ہیں۔
اس سے قبل جنوری 2023 میں چین کی فوجان یونیورسٹی کی ایک تحقیق میں بتایا گیا تھا کہ ٹی وی یا دیگر اسکرینوں کے سامنے زیادہ وقت گزارنے سے ڈپریشن سے متاثر ہونے کا خطرہ بڑھتا ہے۔
تحقیق میں بتایا گیا کہ اسکرین کے سامنے گزارے جانے والا ہر گھنٹہ کسی فرد میں ڈپریشن کا خطرہ 5 فیصد تک بڑھا دیتا ہے۔
اس سے قبل بھی تحقیقی رپورٹس میں دریافت کیا گیا تھا کہ اسمارٹ فون، کمپیوٹر یا دیگر اسکرینوں کے سامنے بہت زیادہ وقت بیٹھ کر گزارنا ذہنی امراض کا خطرہ بڑھاتا ہے۔