ایمازون ویب سروسز (AWS) نے صحت کے شعبے میں انتظامی بوجھ کم کرنے اور مریضوں کو بہتر سہولت فراہم کرنے کے لیے نیا AI حل لانچ کر دیا ہے۔

کمپنی کے مطابق یہ نظام کلینکس اور اسپتالوں میں اپائنٹمنٹ بکنگ، مریض کی تصدیق، میڈیکل ہسٹری کی جانچ، ڈاکیومنٹیشن اور میڈیکل کوڈنگ جیسے کام خودکار طریقے سے انجام دے گا، جس سے طبی عملہ زیادہ وقت براہِ راست مریضوں کی دیکھ بھال پر دے سکے گا۔

یہ سسٹم الیکٹرانک ہیلتھ ریکارڈز (EHR) کے ساتھ مربوط ہو کر کام کرے گا اور 24 گھنٹے قدرتی زبان میں مریضوں کی درخواستیں سمجھ کر فوری اپائنٹمنٹ بک کر سکے گا۔ ضرورت پڑنے پر یہ خودکار طور پر انسانی اسٹاف کو کیس منتقل بھی کرے گا تاکہ پیچیدہ یا طبی نوعیت کے معاملات میں مناسب رہنمائی فراہم کی جا سکے۔

مزید پڑھیں: امریکا میں ویکسین گائیڈ لائنز میں تبدیلیوں سے ہیلتھ سیکٹرز چیلنجز کا شکار

کمپنی کے مطابق اس ٹیکنالوجی سے کال سنٹرز میں وقت کی بچت ہوگی اور کئی اداروں میں کال چھوڑنے کی شرح میں نمایاں کمی دیکھی گئی ہے۔ کچھ صحت کے نظاموں میں اس حل کے ذریعے ہفتہ وار سیکڑوں گھنٹے براہِ راست مریضوں کی معاونت کے لیے منتقل کیے جا رہے ہیں۔

نظام وزٹ سے قبل مریض کی مکمل میڈیکل ہسٹری کا خلاصہ تیار کرتا ہے، دورانِ وزٹ گفتگو کی ریکارڈنگ سے نوٹس بناتا ہے اور بعد از وزٹ مریض کے لیے آسان فہم خلاصہ اور بلنگ کوڈز تیار کرتا ہے۔

کمپنی کا کہنا ہے کہ ہر AI نتیجے کو اس کے اصل ماخذ سے منسلک کیا جاتا ہے تاکہ شفافیت اور آڈٹ کی سہولت برقرار رہے۔

AWS کے مطابق یہ اقدام مضبوط سیکیورٹی اور عالمی معیار کے ڈیٹا تحفظ کے اصولوں پر مبنی ہے، جبکہ شراکت دار ادارے پہلے ہی اس ٹیکنالوجی کے مثبت نتائج رپورٹ کر رہے ہیں۔

کمپنی کا کہنا ہے کہ اس منصوبے کا مقصد صحت کے نظام میں رکاوٹوں کو کم کرنا اور مریضوں و ڈاکٹروں دونوں کے لیے سہولت بڑھانا ہے۔