اسپیکر پنجاب اسمبلی چوہدری پرویز الہیٰ کا کہنا ہے کہ قرآن پاک پر عمل کر کے ملک اپنا کھویا ہوا مقام حاصل کرسکتا ہے۔
تفصیلات کے مطابق اسپیکر پنجاب اسمبلی چوہدری پرویز الہیٰ نے پنجاب اسمبلی میں پریس کانفرنس کرتے ہوئے کہا کہ کیفے ٹیریا میں پہلی پریس کانفرنس ہو رہی ہے، پنجاب اسمبلی کی تاریخ میں تاریخی کام ہوا ہے۔
انہوں نے کہا کہ دی پنجاب کمپلسری ٹیچنگ قرآن بل پاس ہوا جو تاریخی کام ہے، متحدہ علماء بورڈ اور مختلف مکاتب فکر نے دی پنجاب کمپلسری ٹیچنگ قرآن میں مدد دی، قرآن بل پر عمل درآمد کے لئےقرآن پہلی سے چھٹی جماعت تک ناظرہ اور چھٹی جماعت سے میٹرک تک ترجمے کے ساتھ بھی قرآن پاک پڑھایا جائے گا۔
چوہدری پرویز الہیٰ نے کہا کہ سرکاری و پرائیویٹ اسکولوں میں قرآن پاک کی تعلیم کو لازمی کر دیا ہے، بھارت کے متعدد لوگوں نے مجھ سے رابطہ کر کے کہا کہ پاکستان بننا واقعی ایک ہی عظیم کارنامہ ہے، اسرائیل زبردستی ملک بنا اور ہم لوگ انتخاب سے قیام میں آئے۔
اسپیکر پنجاب اسمبلی چوہدری پرویز الہیٰ نے مزید کہا کہ قرآن بل آئندہ آنے والی نسلوں کے لئے ہوگا اور مستقبل میں اس کا فائدہ ہوگا، قرآن بل قانون کا اثر ملک کی بنیادوں پر ہوگا اسے مضبوط کرنے اور وحدت کا سنگ بنیاد ہے، جب بنیاد مضبوط ہوگی تو عمارت خود بخود بہتر اور خوبصورت ہوگی۔
