ایس ایس پی شہید چوہدری اسلم کی بائیوپک فلم ’’چوہدری‘‘ ریلیز کیلئے تیار کر لی گئی۔
سندھ پولیس کے تعاون سے بنائی گئی ایکشن پاکستانی فلم ’’چوہدری‘‘ ریلیز کے لئے تیار کر لی گئی ہے یہ فلم ’’چوہدری‘‘ ایک شہید پولیس افسر، ایس ایس پی چوہدری اسلم خان کی پہلی بائیوپک ہے۔
یاد رہے کہ چوہدری اسلم خان ’’پولیس بابا‘‘ کے نام سے بھی مشہور تھے اور ’’انکاؤنٹر اسپیشلسٹ‘‘ کے حوالے سے جانے جاتے تھے۔
فلم میکرز کے مطابق یہ فلم چوہدری اسلم کی پیشہ ورانہ زندگی کے اہم واقعات کو اجاگر کرنے کے ساتھ ساتھ مرحوم ایس ایس پی کے ذاتی پہلوؤں کو بھی اجاگر کرتی ہے۔
https://www.youtube.com/watch?v=-Q00JmmXPTw
فلم کی کاسٹ میں اے ایس پی طارق اسلم، یاسر حسین، ثنا فخر، نوال سعید، عدنان شاہ ٹیپو، شمعون عباسی، اظفر علی، سلیم معراج، ارباز خان سمیت دیگر شامل ہیں۔
اس فلم کی ہدایتکارعظیم سجاد جبکہ اس کے رائٹر ذیشان جنید ہیں، جبکہ اے ایس پی طارق اسلم نے فلم میں مرکزی کردار یعنی چوہدری اسلم کا کردار ادا کیا ہے۔
فلم کی پروڈیوسر نیہا لاج کا کہنا ہے کہ حقیقی زندگی کی کہانیاں وقت کی ضرورت ہیں کیونکہ یہ کہانیاں اثر انگیز ہونے کے ساتھ ساتھ زیادہ اہم ہوتی ہیں۔
انہوں نے کہا کہ اس طرح کی فلمیں عوام کو اخلاقی بہتری کی طرف راغب کرتے ہوئے سیکھنے کا نقطۂ نظر پیش کرتی ہیں۔
واضح رہے کہ فلم میں راحت فتح علی خان کی ایک قوالی بھی شامل ہے یہ فلم 27 مئی 2022ء کو پورے پاکستان اور امریکا میں ریلیز کی جائے گی۔
