اسلام آباد: وزارت توانائی (پاور ڈویژن) نے بجلی کے بلوں میں پی ٹی وی کی فیس ختم کرنے کا پلان تیار کرلیا ہے۔
وزیراعظم کی ہدایت پر پاور ڈویژن نے پی ٹی وی سمیت دیگر غیر ضروری سرچارجز ختم کرنے کی تجاویز مرتب کی ہیں، جنہیں اگلے ہفتے وزیراعظم کی زیر صدارت اجلاس میں پیش کیا جائے گا۔
اس وقت ہر گھریلو صارف سے 35 روپے ماہانہ پی ٹی وی فیس وصول کی جاتی ہے جب کہ انڈسٹری اور کمرشل صارفین پر بھی یہ فیس لاگو ہے۔
ملک بھر کے 4 کروڑ 26 لاکھ بجلی صارفین سے پی ٹی وی فیس کی مد میں تقریباً ڈیڑھ ارب روپے ماہانہ وصول کیے جارہے ہیں۔
ذرائع کے مطابق حکومت بجلی صارفین پر مالی بوجھ کم کرنے کے لیے اقدامات کر رہی ہے اور پی ٹی وی فیس کا خاتمہ بھی اسی پالیسی کا حصہ ہے۔
تاہم اس حوالے سے حتمی فیصلہ وزیراعظم کی زیر صدارت اجلاس کے بعد کیا جائے گا۔
