سینئر اداکار سید عاصم بخاری کو دل کا دورہ پڑنے پر فوری طور پر پنجاب انسٹیٹیوٹ آف کارڈیالوجی منتقل کیا گیا، جہاں ان کا علاج جاری ہے۔
ڈاکٹروں کے مطابق ان کے پھیپھڑے بھی مکمل طور پر کام نہیں کر رہے تھے، تاہم مسلسل طبی نگہداشت کے باعث ان کی حالت میں بہتری آ رہی ہے۔
عاصم بخاری کی صحت کے لیے شوبز سے تعلق رکھنے والی شخصیات اور مداحوں نے دعا کی اپیل کی ہے۔
مزید پڑھیں: سینئر اداکار عاصم بخاری کے ساتھ بڑا فراڈ ہو گیا
سید عاصم بخاری پاکستان کے سینئر اور ممتاز اداکاروں میں شمار کیے جاتے ہیں، جنہوں نے تھیٹر، ٹی وی، فلم اور ریڈیو جیسے مختلف پلیٹ فارمز پر اپنی صلاحیتوں کا بھرپور مظاہرہ کیا۔
وہ نہ صرف ایک باکمال اداکار ہیں بلکہ شاعر، مصنف اور ہدایت کار کے طور پر بھی جانے جاتے ہیں۔
عاصم بخاری نے اپنے فنی سفر کا آغاز ریڈیو سے کیا، بعد ازاں وہ پی ٹی وی کے مشہور ڈراموں میں نظر آئے، جن میں “عینک والا جن”، “جنجال پورہ” اور کئی دیگر قابلِ ذکر ہیں۔
ان کا اندازِ اداکاری سادہ، جذباتی اور حقیقت سے قریب ہوتا ہے، جس کی وجہ سے ناظرین ان سے گہرا تعلق محسوس کرتے ہیں۔
اداکاری کے ساتھ ساتھ وہ صوفیانہ شاعری میں بھی دلچسپی رکھتے ہیں اور ان کے کئی مجموعے شائع ہو چکے ہیں۔
انہوں نے پاکستانی ثقافت اور ادب کو نئی جہت دی ہے، جس پر حکومتِ پاکستان کی جانب سے انہیں “پرائڈ آف پرفارمنس” جیسے اعلیٰ اعزاز سے بھی نوازا گیا۔
