آج عالمی کموڈیٹی، قیمتی دھاتوں اور کرپٹو کرنسی کی قیمتوں میں زبردست کمی دیکھی جا رہی ہے، جس سے عالمی مارکیٹس ہل کر رہ گئی ہیں۔
دنیا بھر کی مالی مارکیٹس نئے ہفتے کا آغاز غیر مستحکم انداز میں کر رہی ہیں، اور ماہرین اسے “میٹلز میلٹ ڈاؤن” قرار دے رہے ہیں جو ایکویٹیز مارکیٹس کو بھی ہلا رہا ہے۔
سونے کی قیمت گزشتہ ہفتے تقریباً $5,600 فی اونس تک پہنچنے کے بعد آج $4,465 فی اونس تک گر گئی ہے، یعنی اس سیشن میں 8% سے زائد کمی ریکارڈ کی گئی ہے۔
چاندی کی قیمت میں بھی آج 13% کی کمی دیکھی گئی، جمعہ چاندی کی قیمت میں 26% کمی ریکارڈ کی گئی تھی، جو تاریخ میں سب سے بڑی کمی تھی۔
مالی ماہر مائیکل براؤن کے مطابق، جمعہ کا دن سونے کے لیے 2013 کے بعد سب سے برا دن تھا اور گزشتہ 45 سالوں میں چوتھا بدترین دن۔ واضح رہے کہ چاندی کو اس کی قیمت میں بہت زیادہ اتار چڑھاؤ کی وجہ سے “شیطانی دھات” کا لقب دیا جاتا ہے۔
ماہرین کے مطابق صدر ٹرمپ کے اعلان کے بعد کہ وہ کیون وارش کو فیڈرل ریزرو کے اگلے چیئرمین کے طور پر نامزد کریں گے، سرمایہ کاروں میں سخت مالیاتی پالیسی کی توقع پیدا ہوئی، جس نے قیمتی دھاتوں میں فروخت کا دباؤ بڑھا دیا ہے۔
کموڈیٹیز اسٹریٹیجسٹ ویوک دھارکے مطابق مضبوط امریکی ڈالر بھی دھاتوں، تیل اور صنعتی دھاتوں پر دباؤ ڈال رہا ہے۔
چیف ٹریڈ اینالسٹ ٹم واٹر کے مطابق وارش کی نامزدگی ابتدائی سبب ہو سکتی ہے، لیکن مارکیٹ میں زبردست کمی کی اصل وجہ فورسڈ لکوئڈیشنز اور مارجن میں اضافہ ہے، جس نے قیمتوں پر زنجیروں کی طرح اثر ڈالا ہے۔
ماہرین کا کہنا ہے کہ سرمایہ کار اس وقت قیمتی دھاتیں بیچ کر اپنی پوزیشنز محفوظ کر رہے ہیں، جس سے مارکیٹس میں غیر یقینی صورتحال مزید بڑھ گئی ہے۔
