پاکستان کے سابق اسپنر ثقلین مشتاق نے انٹرنیشنل کرکٹ کونسل پر جانبداری کا الزام عائد کرتے ہوئے اسے طنزیہ انداز میں انڈین کرکٹ کونسل قرار دے دیا۔

ان کا کہنا ہے کہ عالمی ایونٹس میں بعض فیصلے ایسے دکھائی دیتے ہیں جو میزبان یا مخصوص ٹیموں کے حق میں جاتے محسوس ہوتے ہیں۔

ثقلین مشتاق نے خاص طور پر بھارت اور ویسٹ انڈیز کے درمیان سپر ایٹ مرحلے کے اہم میچ کا حوالہ دیا، جو ایڈن گارڈنز میں کھیلا گیا۔

ان کے مطابق اس مقابلے کے لیے ایسی وکٹ تیار کی گئی جس سے بھارتی ٹیم کو واضح فائدہ پہنچا۔

سابق آف اسپنر نے دعویٰ کیا کہ عالمی کرکٹ کا نگراں ادارہ چاہتا تھا کہ بھارتی ٹیم سیمی فائنل تک رسائی حاصل کرے۔

یاد رہے کہ پاکستان ٹیم گروپ مرحلے میں سری لنکا کو شکست دینے کے باوجود کم رن ریٹ کی وجہ سے سیمی فائنل کی دوڑ سے باہر ہوگئی تھی، جس کے بعد سوشل میڈیا اور کرکٹ حلقوں میں بحث چھڑ گئی۔

 دوسری جانب بھارت نے ویسٹ انڈیز کو باآسانی قابو کرتے ہوئے اگلے مرحلے میں جگہ بنائی۔ اس میچ میں اوپنر سنجو سیمسن کی ناقابل شکست 97 رنز کی اننگز فیصلہ کن ثابت ہوئی۔