قومی اسمبلی کے سپیکراسد قیصر کی قیادت میں پاکستان کے پارلیمانی وفد نے آج ریاض میں سعودی عرب کے شاہ سلمان بن عبدالعزیز سے ملاقات کی۔

تفصیلات کے مطابق سپیکر قومی اسمبلی اسد قیصر اور سعودی فرمانروا شاہ سلمان بن عبدالعزیز کے درمیان ہونے والی ملاقات میں دونوں ملکوں کے درمیان تاریخی تعلقات کے فروغ سمیت اہم امور پر بات چیت کی گئی۔۔

دونوں رہنماؤں کے درمیان ملاقات میں پارلیمانی سطح پر دونوں ملکوں کے درمیان دوطرفہ تعلقات کے فروغ کا بھی جائزہ لیا گیا۔

قومی اسمبلی کے سپیکر نے شاہ سلمان کو مقبوضہ کشمیر کی موجودہ صورتحال کے بارے میں بتایا۔شاہ سلمان نے خطے میں امن اور امت مسلمہ کے درمیان اتحاد کیلئے پاکستان کے کردار کو سراہا۔

جدہ: وزیراعظم کی سعودی فرمانروا شاہ سلمان سے ملاقات

شاہ سلمان نے کہا کہ میرا ملک اقوام متحدہ کی قراردادوں کے مطابق مسئلہ کشمیر کے پرامن حل کا خواہاں ہے

اس موقع پر وزیر خارجہ شہزادہ فیصل بن فرحان بن عبد العزیز، مجلس شوریٰ کے صدر شیخ ڈاکٹر عبد اللہ بن محمد آل الشیخ، وزیر مملکت، کابینہ کے رکن اور قومی سلامتی کے مشیر ڈاکٹر مساعد العیبان اوراسلام آباد میں سعودی سفیر نواف بن سعید المالکی کے علاوہ سعودی عرب میں پاکستان کے سفیر راجہ علی اعجاز بھی موجود تھے۔

یاد رہے کہ قومی اسمبلی کے سپیکر اسد قیصرسعودی عرب کے دورے پراتوار کو ریاض پہنچے تھے جس پر سعودی مجلس شوریٰ کے چیئرمین نے دورے کی دعوت قبول کرنے پر سپیکر قومی اسمبلی کا شکریہ ادا کیا اور کہا کہ اعلیٰ سطح کے دوروں کے تبادلے سے پاکستان اور سعودی عرب کے دیرینہ تعلقات کو مزید تقویت ملے گی۔

اس سے قبل سعودی مجلس شوریٰ کے چیئرمین عبد اللہ آل الشیخ نے رواں سال پاکستان کا تین روزہ کامیاب دورہ کیا تھا جس کے دوران انہوں نے قومی اسمبلی کے سپیکر کو پارلیمانی وفد کے ہمرا سعودی عرب کا دورہ کرنے کی دعوت دی تھی۔