پاکستان مسلم لیگ(ن) کی ترجمان مریم اورنگزیب نے کہا ہے کہ عمران صاحب آپ اتنے نالائق ہیں کہ 16 ماہ میں نواز شریف کے منصوبوں جیسا ایک منصوبہ بھی شروع نہیں کر سکے۔

تفصیلات کے مطابق پاکستان مسلم لیگ(ن) کی ترجمان مریم اورنگزیب نے ازاخیل نوشہرہ ریلوے ڈرائی پورٹ کے افتتاح پر ردعمل دیتے ہوئے کہا کہ عمران صاحب آج پھر  ازاخیل نوشہرہ ریلوے ڈرائی پورٹ کے منصوبے پہ تختی لگائی جس کی بنیاد وزیراعظم نواز شریف نے رکھی تھی۔

 مریم اورنگزیب نے یہ بھی کہا کہ عمران صاحب خیبر پختونخواہ میں اپنی حکومت کے چھ سال میں ازاخیل ڈرائی پورٹ جیسا ایک منصوبہ دکھا دیں؟ تاہم آپ کی صلاحیت اور قابلیت پشاور میٹرو کے ایک کھرب 25 کروڑ کے کھڈوں سے عیاں ہے۔

پاکستان مسلم لیگ(ن) کی ترجمان کا کہنا تھا کہ وزیراعظم نواز شریف نے از خیل نوشہرہ ڈرائی پورٹ تجارت ، روزگار اور کاروبار میں آسانیوں کے لئے بنایا تھا لیکن عمران صاحب آپ نے یہ منصوبہ بھی سولہ ماہ میں تباہ کر دیا۔

مریم اورنگزیب کا یہ بھی کہنا تھا کہ عمران صاحب آپ کے حسد اور بغض نے ازا خیل نوشہرہ ریلوے ڈرائی پورٹ کے تیار منصوبے کو سولہ ماہ کی تاخیر سے شروع کیا جبکہ ڈرائی پورٹ کا منصوبہ نواز شریف نے پچاس کروڑ کی لاگت سے شروع کیا تھا اور 2018 میں اس پر 90 فیصد کام مکمل ہو گیا تھا۔

مریم اورنگزیب کا ہنرمند نوجوان پروگرام کے افتتاح پر ردعمل

پاکستان مسلم لیگ(ن) کی ترجمان نے اپنے بیان میں عمران خان پر تنقید کرتے ہوئے  کہا کہ پچھلے پانچ سال میں جتنے پیسے ریلوے پر خرچ ہوئے ہیں وہ سوچ اور سمجھ سے بالاتر ہیں جبکہ عمران صاحب نے  پہلے ملک آئی ایم ایف کے حوالے کیا اور  اب اپنے دوستوں کو نوازنے کے لئے سرکاری زمینیں بیچنے کی تیاری ہے۔

مریم اورنگزیب نے یہ بھی کہا کہ عمران صاحب انڈے ، مرغی ، کٹے اور لنگر کی سوچ رکھنے والے نواز شریف کے منصوبوں پر تختیاں لگا کر صرف تالیاں بجوا سکتے ہیں۔

پاکستان مسلم لیگ(ن) کی ترجمان مریم اورنگزیب نے مزید کہا کہ پچاس لاکھ گھر  دینے کا وعدہ کیا تھا  لیکن سلیکٹیڈ حکومت   تو سرکاری زمین  بھی بیچنے لگے ؟ لیکن عمران صاحب انشاالللہ عوام کو بھی پتہ ہے کہ پچاس لاکھ گھر اور ایک کڑوڑ نوکری نواز شریف اور شہباز شریف کے منصوبوں سے ملیں گے۔