کورونا وائرس کو پھیلنے سے روکنے کے لئے صوبے سندھ میں اتوار کی رات 12 بجے سے کرفیو نافذ ہے ۔ جس میں پبلک ٹرانسپورٹ سمیت ، عوام کا گھروں سے بغیر کسی کام کے باہر نکلنے اور دیگر پر پابندی عائد کی گئی ہے ۔ تاہم ، اب کمشنر کراچی نے کھانے کی ہوم ڈیلیوری اورپارسل پربھی پابندی عائد کردی ہے ۔ جبکہ دکاندار وں کو سندھ حکومت کی مقررہ پرائس لسٹ کے مطابق اشیاء خورد و نوش فروخت کرنے کی ہدایت کی گئی ہے۔

سندھ بھر میں کورونا وائرس کے پھیلائو کو روکنے کے لیے حکومت سندھ کی جانب سے 15 روز کے لاک ڈائون کے بعد کمشنر کراچی کی جانب سے بھی کچھ اہم اقدامات سامنے آئے ہیں۔کمشنر کراچی افتخار شلوانی نے کہا ہے کہ شہر میں بسیں، آن لائن ٹیکسی سروسز، بس سروس اور رکشے وغیرہ کو شاہراہوں پر گزرنے کی اجازت نہیں ہوگی، جبکہ گھر کے صرف ایک فرد کو سودا سلف خریدنے کی اجازت ہوگی۔انہوں نے کہا کہ شہر میں پیٹرول پمپس پر کسی گاڑی میں 10 لیٹر سے زیادہ پیٹرول نہیں ڈالا جائے گا۔

دوسری جانب محکمہ داخلہ سندھ نے ڈبل سواری پر پابندی کا نوٹیفکیشن بھی جاری کردیا ہے، جس کے تحت ڈبل سواری پر پابندی 15 روز کے لیے عائد کی گئی ہے تاہم صحافی ڈبل سواری سے مستثنیٰ ہوں گے۔ واضح رہے کہ کورونا وائرس کے خطرات کے باعث سند ھ کے بعد وفاقی دارالحکومت اسلام آباد سمیت باقی تمام صوبوں اور آزاد کشمیر سمیت ملک بھر میں فوج کو طلب کر لیا گیا۔ پاکستان میں کورونا وائرس سے جاں بحق افراد کی تعداد 6 ہوگئی، مہلک وائرس سے 884 افراد متاثر ہوچکے ہیں۔