وزیراعظم کے معاون خصوصی عثمان ڈار کا کہناہے کہ نیب میں پیشیاں بھگتنے والے ہمیں حکومت چلانے کے طریقے نہ بتائیں، تنقید کرنیوالے بتائیں اپنے دور میں کونسی دودھ اور شہد کی نہریں چھوڑ کر گئےہیں۔

تفصیلات کے مطابق لیگی رہنماء خواجہ آصف کے بیان پر ردعمل دیتے ہوئے معاون خصوصی عثمان ڈار نے جوابی وار کرتے ہوئے کہا کہ غیر ملکی کمپنی کا بے روزگار مزدور دیہاڑی کی تلاش میں ہے،جب سے دبئی کی کمپنی چھوڑی خواجہ صاحب گھبرائے گھبرائے پھرتے ہیں،آج کل انکا سارا گزر بسر عمران خان اور حکومت پر تنقید سے ہو رہا ہے۔

عثمان ڈار نے کہا کہ پوری لیگی قیادت ایڑیاں رگڑ رگڑ کر کرپٹ لیڈر کے دفاع میں مصروف ہے، آپ کی نا اہلی، کرپشن اور کک بیکس کی وجہ سے منصوبے تاخیر کا شکار ہوئے،آج ہر منصوبے پر شفافیت اور میرٹ پر کام آگے بڑھایا جا رہا ہے۔

معاون خصوصی کا مزید کہناتھا کہ حکومت مافیا کی سرپرستی کر رہی ہوتی تو آپ شور شرابا نہ کرتے،ہمیں مافیا کی سرپرستی کرنی ہوتی تو سب سے پہلا مک مکا آپ سے ہوتا،عمران خان کی جدو جہد اور سب سے بڑے سسیلین مافیا کا نتیجہ آپ کے سامنے ہے،مافیا کا اصل سرغنہ اپنی پلیٹیں لے کر باہر چلا گیا چمچے یہی چھوڑ دئیے۔

عثمان ڈار نے مزید تنقید کے نشتر برساتے ہوئے کہا کہ بڑے بڑے منصوبوں کی بات کرنے والے اپنے حلقے میں ایک وینٹی لیٹر تک نہ دے سکے،جس حلقے سے منتخب ہو کر آپ پارلیمنٹ تک پہنچے اسے صحت کی کیا سہولت دی؟سیالکوٹ کے کسی ہسپتال میں ایک بھی وینٹی لیٹر کا نہ ہونا آپ کی نا اہلی کیلئے کافی ہے۔

معاون خصوصی عثمان ڈار نے کہا کہ حکومت نےسیالکوٹ کے ہسپتالوں میں وینٹی لیٹرز اپنی کوششوں سے پہنچائے،125 سے زائد ہائی فلو آکسیجن بیڈز کا انتظام ہسپتال کے حوالے کر دیا ہے۔

انہوں نے کہا کہ سیالکوٹ کی عوام جاننا چاہتی ہے کہ ووٹوں کے بدلے آپ نے انہیں کیا دیا۔