6 ستمبر یومِ دفاع کے موقع پر مزار قائد پر گارڈز کی تبدیلی کی تقریب منعقد کی گئی۔

 تفصیلات کے مطابق مزار قائد پر پاکستان ایئر فورس ( پی اے ایف) اصغرخان اکیڈمی کے کیڈیٹس نے گارڈز کے فرائض سنبھال لیے جبکہ فرائض سنبھالنے والے گارڈز میں 3 خواتین سمیت 46 کیڈٹس شامل ہیں۔

تقریب کے مہمان خصوصی ایئر آفیسر کمانڈنگ اصغرخان اکیڈمی ائیروائس مارشل شکیل غضنفر نے مزار قائد پر پھول رکھے اور فاتحہ پڑھی۔

مہمان خصوصی ایئر وائس مارشل شکیل غضنفرکا اپنے خطاب میں کہنا تھا کہ ہماری قومی سلامتی کو سب سے بڑا مسئلہ 6 ستمبر کو ہوا، آج 6 ستمبر دفاع پاکستان پرتبدیلی گاڈز پر پی اے ایف اکیڈمی کا سر فخر سے اونچا ہوگیا ہے۔

انہوں نے کہا کہ  6 ستمبر 1965 کی جنگ میں شہدا کو خراج تحسین پیش کرتے ہیں، ہمارا مقابلہ ایک ایسے دشمن سے تھا جو ہم سے چار گنا بڑا تھا۔

 خطاب کے دوران ایئر وائس مارشل شکیل نے کہا کہ آپریشن راہ نجات، ردالفساد کی کامیابیاں قوم کے سامنے ہیں  ، پاکستان کی فضائی سرحدیں ناقابل تسخیر ہیں، پاک فضائیہ نے 27 فروری 2019 کو بھارت کو بھر پور جواب دیا۔

ایئر وائس مارشل شکیل غضنفر نے کہا کہ ہماری قوم کو 1965کی جنگ اور حالیہ آپریشن پر فخر ہے، دشمن کے عزائم کو بھرپور طریقے سے جواب دیا ہے اور دیتے رہیں گے۔

مفکر پاکستان علامہ محمد اقبال کے مزار پربھی گارڈزکی تبدیلی

لاہور میں یوم دفاع کے موقع پر مفکر پاکستان علامہ محمد اقبال کے مزار پر بھی گارڈز کی تبدیلی کی پروقار تقریب منعقد کی گئی۔

تقریب کے مہمان خصوصی ڈی جی پاکستان رینجرز میجر جنرل عامر مجیدنے مزارِ اقبال پر پھول رکھے اور فاتحہ پڑھی۔

نیول ہیڈ کوارٹر اسلام آباد یادگار شہداء پر تقریب

نیول ہیڈکوارٹرز اسلام آباد میں یادگار شہداء پر یوم دفاع کی تقریب میں چیف آف دی نیول اسٹاف ایڈمرل ظفر محمود عباسی نے شرکت کی۔

ایڈمرل ظفر محمود عباسی نے یادگارِ شُہدا پر پھول رکھے اور فاتحہ پڑھی،  نیول چیف نے اس موقع پر شُہدا کے اہلخانہ سے ملاقات کی اور انہیں تحائف بھی دیئے۔