غذائی ماہرین مچھلی کو ’سپر فوڈ‘ قرار دیتے ہیں ، ماہرین کا کہنا ہے کہ ہفتے میں تین بار مچھلی کھائیں اور لمبی عمر پائیں۔

 اب نئی تحقیق سے معلوم ہوا ہے کہ باقاعدگی سے مچھلی کھانے والے خواتین و حضرات طویل عمر پاتے ہیں، جس کی وجہ یہ ہے کہ مچھلی کئی امراض کو دور کرتے ہوئے جسم کو بہترین حالت میں رکھتی ہے۔

زیادہ مچھلی کھانے اور اومیگا تھری کے استعمال سے قبل ازوقت اموات کا خطرہ کم ہوجاتا ہے۔

تحقیق سے یہ بات بھی سامنے آئی ہے کہ مچھلی نہ کھانے والے افراد کے مقابلے میں زیادہ مچھلی کھانے والوں میں موت کا خطرہ 9 فیصد تک کم ہوتا ہے۔

برطانوی ماہرین کا کہنا ہے کہ مرغی اور مچھلی کھانے والے لمبی عمر پاتے ہیں جبکہ (سرخ) بڑا گوشت کھانے سے کئی بیماریاں لاحق ہونے کے خطرات ہیں اور یہ عمر میں کمی کا سبب بنتا ہے۔

 یونیورسٹی آف نارتھ کیر ولینا کے ڈائریکٹر بیری ہاپکنز نے کہا کہ گوشت (سرخ)  کھانے میں کمی کرنا ضروری ہے۔

محققین کے مطابق  یہ نہیں کہا جا رہا کہ گوشت کھانا بند کردیا جائے بلکہ صرف اس میں کمی لائی جائے۔

:مچھلی کی یہ خصوصیات جا ننا بھی ضروری ہے کہ

مچھلی کھانے سے دل کے امراض کی شرح میں 10 فیصد کمی ہوتی ہے۔

کینسر کے خطرات 6 فیصد تک کم ہوجاتے ہیں۔

سانس کے امراض کی شرح میں 20 فیصد اور جگر کی بیماریوں کی شرح 37 فیصد تک کم ہوجاتی ہے۔

ان کے علاوہ دماغی امراض اور الزائیمر سے بچانے میں بھی مچھلی ایک اہم کردار ادا کرتی ہے۔

طبی ماہرین کی تحقیق سے یہ بات سامنے آئی ہے کہ جو افراد زیادہ گوشت کھاتے ہیں، ان کی جلدی موت کے امکانات زیادہ ہیں اور خاص طور پر ان میں امراض قلب یا سرطان ہونے کے امکانات بھی زیادہ ہوتے ہیں۔