موٹروے زیادتی کیس میں بڑی پیش رفت سامنے آگئی۔

تفصیلات کے مطابق موٹروے زیادتی کیس میں نامزد ملزمان کا جیل ٹرائل کرنے کا فیصلہ کر لیا گیا ہے، کیس کا جیل ٹرائل کل سے لاہور میں واقع کیمپ جیل میں شروع ہوگا۔

ذرائع کے مطابق انسداد دہشت گردی عدالت کے جج ارشد حسین بھٹہ جیل میں ٹرائل کریں گے،ملزمان کے خلاف چالان جمع ہونے کے بعد ٹرائل جیل میں ہوگا۔

ذرائع نے بتایا ہے کہ پراسکیوٹر عبد الرؤف وٹو سمیت سرکاری وکلاء ٹرائل کے موقع پر جیل میں پیش ہوں گے۔

ذرائع نے بتایا کہ سکیورٹی خدشات کے پیش نظر ملزمان کو عدالت میں پیش نہیں کیا جائے گا۔

عدالت میں ملزمان کے خلاف جمع کروایا گیا چالان دو سو سے زائد صفحات پر مشتمل ہے جس میں 40گواہان کو شامل کیا گیا ہے۔

گزشتہ سماعت کے دوران پولیس نے ملزمان کے خلاف پیش کردہ حتمی چالان میں گواہان میں متاثرہ خاتون، مقدمے کا مدعی اور 15 پر کال کرنے والا شخص کوبھی شامل کیا ہے۔

 چالان کے مندرجات کے مطابق سانحے کے وقت موجود خاتون کے 3 بچوں کو گواہوں کی لسٹ میں شامل نہیں کیا گیاجبکہ متاثرہ خاتون نے ملزمان عابد ملہی اور شفقت کی شناخت پریڈ جیل میں کی۔

 دونوں ملزمان کی شناخت پریڈ جوڈیشل مجسٹریٹ کے سامنے کروائی گئی، متاثرہ خاتون کا 3 مرتبہ بیان ریکارڈ کیا گیا۔ چالان کے مطابق عابد ملہی اور شفقت سے آلہ ضرب بھی برآمد کیا گیا، پولیس نے شفقت سے ڈنڈا بالامستری کے گھر سے برآمد کروایا جبکہ ملزم عابد ملہی سے پستول تھانہ فیکٹری ایریا شیخوپورہ سے برآمد کروایاگیا۔

چالان میں بتایا گیا کہ پولیس نے عابد ملی اور شفت بگا کا موبائل فون بھی برآمد کیا ، عابد ملہی نے خاتون سے لوٹی 1 لاکھ سے زائد کی رقم اس وقت خرچ کی جب وہ روپوش تھا۔

پولیس نے ملزم عابد ملہی سے خاتون کے سونے کے کڑے اور اے ٹی ایم بھی برآمد نہیں کروایا، چالان کے مطابق شفقت عرف بگا نے اقبال جرم کرلیا ہے اور دفعہ 164 کا بیان ریکارڈ کروا دیا۔

 ملزم شفقت عرف بگا کا بیان جوڈیشل مجسٹریٹ رحمان الہی نے ریکارڈ کیا، چالان میں مزید کہا گیا کہ عابد ملہی نے تفتیشی کے روبرو اعتراف جرم کیا اور دفعہ 161 کا بیان ریکارڈ کروایا، ملزمان نے بتایا جب خاتون نے انکار کیا تو بچوں کو مارنے کی دھمکی دی۔