دنیا بھر میں عالمی وبا کورونا وائرس سے نجات کے لیے ویکسی نیشن کا عمل جاری ہے اور تمام بڑے ممالک میں اسے ہر شہری کے لیے لازمی قرار دیا گیا ہے۔

رمضان کی آمد، آمد ہے یہی وجہ ہے کہ دنیا بھر میں مسلمانوں کے ذہنوں میں یہ سوال گردش کر رہا تھا کہ کورونا سے بچاؤ کےلیے لگائی جانے والی ویکسین روزے کی حالت میں لی جاسکتی ہے یا نہیں؟

بین الاقوامی ذرائع ابلاغ کے مطابق سعودی عرب کے مفتی اعظم اور علما کمیٹی کے سربراہ عبدالعزیز بن عبداللہ آل شیخ نے کہا ہے کہ کورونا ویکسین لگوانے سے روزہ نہیں ٹوٹتا۔

مفتی اعظم نے کہا ہے کہ ویکسین پٹھے میں لگائی جاتی ہے جس سے روزہ نہیں ٹوٹتا اور نہ ہی ویکسین کھانے پینے کی کوئی شے ہے۔

دوسری جانب اسلامک افیئرز اینڈ چیریٹیبل ایکٹویٹیز ڈیپارٹمنٹ دبئی کے مفتی اعظم ڈاکٹر محمد عیادہ الکبیسی کا کہنا ہے کہ علما کا اس بات پر اتفاق ہے کہ رگوں یا گوشت میں لگائے جانے والے انجیکشن سے روزہ نہیں ٹوٹتا۔

ذرائع کے مطابق برطانیہ میں بھی اس وقت ویکسین لگانے کا عمل تیزی سے جاری ہے اور رمضان سے قبل ہی وہاں کی اسلامک میڈیکل ایسوسی ایشن نے ایک اہم بیان جاری کیا ہے۔

اس حوالے سے علماء کرام کی رائے ہی حتمی ہو گی لیکن برطانوی اسلامک میڈیکل ایسوسی ایشن کا کہنا ہےکہ کورونا ویکسین روزے کی حالت میں بھی لی جاسکتی ہے۔

برطانوی اسلامک میڈیکل ایسوسی ایشن کا کہنا ہےکہ برطانیہ میں اس وقت دی جانے والی کورونا ویکسین سے روزے پر کوئی فرق نہیں پڑتا لہٰذا شہریوں کو رمضان کی وجہ سے کورونا ویکسین کے حوالے سے پریشان نہیں ہونا چاہیے۔

اسلامک میڈیکل ایسوسی ایشن کا مزید کہنا ہےکہ کورونا وائرس کی ویکسین پٹھوں کے ذریعے دیا جانے والا انجیکشن ہے جو اس وقت ویکسین دیے جانے کا واحد طریقہ کار ہے اسی وجہ سے ویکسی نیشن کا عمل روزے پر اثر انداز نہیں ہوتا۔