وزیراعظم عمران خان نے کہا ہے کہ ہم اپنا ملک بند نہیں کرسکتے کیونکہ ہمارے پاس اتنے وسائل نہیں ہیں۔

تفصیلات کے مطابق وزیراعظم عمران خان نے کورونا سے متعلق اپنے ویڈیو پیغام میں کہا کہ کورونا کے کیسز میں تیزی سے اضافہ ہورہا ہے، تیسری لہر بہت خطرناک ہے۔

عمران خان نے کہا کہ میں نےکورونا سے محفوظ رہنے کے لیے ایک سال احتیاط کی اور کسی نجی تقریب میں شرکت نہیں کی مگر سینیٹ الیکشن کے دوران احتیاط نہیں کرسکا۔

کورونا وبا کے حوالے سے وزیر اعظم عمران خان کا قوم کے لئے اہم پیغام.@ImranKhanPTI https://t.co/PTEWrRz2UC

Advertisement

— Government of Pakistan (@GovtofPakistan) March 28, 2021

وزیراعظم نے یہ بھی کہا کہ کورونا وائرس سینے میں داخل ہوجائے تو صورت حال خطرناک ہوجاتی ہے، اللہ نے مجھ پر اور اہلیہ پر خاص کرم کیا ہے۔

عمران خان کا کہنا تھا کہ ملک میں کورونا کی تیسری لہر برطانیہ سےآئی ہے کیونکہ بڑی تعداد میں لوگ برطانیہ سے لاہور آئے۔

وزیراعظم کا یہ بھی کہنا تھا کہ لاہور کے علاوہ خیبرپختونخواہ کے دارالحکومت پشاور میں بھی کورونا کے زیادہ کیسز رپورٹ ہورہے ہیں اور اب صورت حال یہ ہے کہ ملک کے تمام اسپتال بھر چکے ہیں۔

عمران خان نے یہ بھی کہنا تھا کہ کورونا کی تیسری لہر نے شدت اختیار کرلی ہے ، ماسک پہننے سے کافی حد تک کرونا سے بچاؤ ممکن ہے لہذا سب احتیاط کریں اگر ایس او پیز پر عمل نہیں کیا تو صورت حال مزید خراب ہوجائے گی۔

وزیراعظم عمران خان کا مزید کہنا تھا کہ دنیا میں کورونا ویکسین کی قلت پیدا ہوگئی ہے، عوام خود ہی خیال رکھیں اور ہجوم والے مقامات پر جانے سے گریز کریں۔