پیپلزپارٹی کے رہنما فیصل کریم کنڈی نے کہا ہے کہ وزیراعظم عمران خان کی نااہلی کے سبب پورا ملک خوف کا شکار ہے۔

تفصیلات کے مطابق پیپلزپارٹی کے رہنما فیصل کریم کنڈی نے  وزیراعظم عمران خان کے خطاب پر ردعمل دیتے ہوئے کہا کہ افسوس کی بات ہے  آج بھی عمران خان نے پارلیمان کو اعتماد میں لینے کے بجائے ٹی وی پر قوم سے خطاب کو ترجیح دی ہے۔

فیصل کریم نے کہا کہ اگر فرانس کے سفیر کی ملک بدری ممکن نہیں ہے تو ایسا معاہدہ کیوں کیا گیا تھا؟

فیصل کریم  نے حکومت سے سوال کرتے ہوئے کہا کہ عمران خان کالعدم تحریک لبیک سے ہوئے معاہدے کو پارلیمان میں کیوں نہیں لائے؟

فیصل کریم  کا کہنا تھا کہ پارلیمان کو بائی پاس کر کے کالعدم تحریک لبیک سے فرانس کے سفیر کی ملک بدری کے معاہدے کی کوئی منطق نہیں ہے۔

انہوں نے کہا کہ عمران خان ماضی میں کالعدم تحریک لبیک کے دھرنوں میں شریک ہوتے رہے ہیں اور میڈیا پر پابندیاں عائد کر کے عمران خان نے ملک کو افواہوں کا مرکز بنادیا ہے۔

فیصل کریم  کا کہنا تھا کہ پاکستان پیپلزپارٹی کی حکومت میں بھی گستاخانہ مواد کا معاملہ اٹھا ہے جسے ڈائیلاگ سے حل کیا گیا تھا۔

فیصل کریم نے یہ بھی کہا کہ عمران خان نے تشدد کا راستہ اختیار کرکے ملک کو ایسے حالات کے حوالے کردیا ہے جس کے خوف ناک نتائج سب بھگتیں گے۔

فیصل کریم کا مزید کہنا تھا کہ عمران خان ملک کو معاشی و سماجی انتشار کی اس نہج پر پہنچا چکے ہیں کہ ان کے پاس مستعفی ہونے کے علاوہ کوئی راستہ نہیں بچا ہے۔