کورونا وباء سے نمٹنے کے لئے سندھ حکومت نے کورونا ایس او پیز سے متعلق نیا حکم نامہ جاری کردیا ہے۔

تفصیلات کے مطابق کورونا وائرس کے پیش نظر محکمہ داخلہ سندھ نے صوبے بھر میں اسکول ، کالجز اور یونیورسٹیز مزید 2 ہفتے کے لئے بند رکھنے کا فیصلہ کیا ہے۔ محکمہ داخلہ سندھ نے کورونا وباء سے نمٹنے کے لئے سندھ کورونا ٹاسک فورس کی ہدایات کی روشنی میں نیا نوٹیفکیشن جاری کردیا ہے۔

محکمہ داخلہ سندھ کی جانب سے جاری حکم نامے کے مطابق کورونا کی موجودہ صورتحال کے پیش نظر بیوٹی پارلر، بیوٹی کلینکس ، سینما گھر ، تھیٹر ، مزارات اور تمام فوڈ اسٹریٹس بند رہیں گی جبکہ صوبے میں شادی ہالز ، ایکسپو ہالز، انڈور گیمز ، پارکس ، گیمنگ زونز اور تمام سیاحتی مقامات بھی بند رہیں گے۔

نئے حکم نامے میں کہا گیا ہے کہ انٹرسٹی، بین الصوبائی ٹرانسپورٹ 50 فیصد مسافروں کے ساتھ جاری رکھنے کی اجازت دی گئی ہے۔صوبے میں کاروبار صبح 5 بجے سے شام 6 بجے تک ہوگا اور شاپنگ مالز کے اندر قائم میڈیکل اسٹور ز بھی شام 6 بجے بند ہوں گے۔

نئے حکم نامے میں یہ بھی کہا گیا ہے کہ صنعتوں،مارکیٹس اوردکانوں کے ملازمین ایس اوپی کے تحت کام کریں گے، اس دوران سماجی فاصلے کا خاص خیال رکھا جائے گا جبکہ اسپتال ، میڈیکل اسٹورز ، پیٹرول پمپ 24 گھنٹےجبکہ بیکریاں اور دودھ کی دکانیں رات 12 بجے تک کھلی رہیں گی۔

محکمہ داخلہ سندھ کی جانب سے جاری حکم نامے میں مزید کہا گیا کہ ڈپٹی کمشنرز اور پولیس ایس او پی پر سختی سے عمل کرانے کی پابند ہوگی، احکامات پر عمل درآمد کے لئے پولیس حکام کو نوٹیفکیشن جاری کردیا گیا ہے۔