اسپیکر پنجاب اسمبلی چوہدری پرویزالہٰی نے کہا کہ پنجاب اور پاکستان میں تعلیم کی ترجیح ہی ہمارا مشن ہے۔

تفصیلات کے مطابق اسپیکر پنجاب اسمبلی چوہدری پرویزالہٰی کی چیئرمین سپیریئر گروپ آف کالجز اینڈ یونیورسٹی پروفیسر ڈاکٹر چوہدری عبدالرحمان سے ملاقات ہوئی جس میں پرائیویٹ یونیورسٹیوں کو درپیش مسائل کے حوالے سے تبادلہ خیال کیا گیا، اس ملاقات میں سیکرٹری پنجاب اسمبلی محمد خان بھٹی بھی موجود تھے۔

چوہدری پرویزالہٰی نے کہا کہ اس مشن کی تکمیل اپنے وزارتِ اعلیٰ کے دور میں بھی کی اور آئندہ بھی کرتے رہیں گے، کوشش ہے کہ پرائیویٹ سیکٹر میں بھی زیادہ سے زیادہ تعلیمی اداروں کا قیام عمل میں لایا جائے تاکہ پنجاب اور پاکستان میں معیاری تعلیم کا فروغ ممکن ہو سکے۔

انہوں نے کہا کہ پنجاب سمیت ملک بھر میں تعلیم کی ترجیح ہماری بنیادی پالیسی کا حصہ رہا ہے، اپنے وزارت اعلیٰ کے دورمیں زیادہ سے زیادہ پبلک اور پرائیویٹ سیکٹر یونیورسٹیوں کے قیام کی کوشش کی جس میں پورے پاکستان بالخصوص پنجاب میں عوام کو اعلیٰ تعلیم سے آراستہ کیا جا سکے۔

اسپیکر پنجاب اسمبلی چوہدری پرویزالہٰی نے مزید کہا کہ انشاء اللہ آئندہ بھی پبلک اور پرائیویٹ سیکٹر میں نئی یونیورسٹیز کے قیام کی حوصلہ افزائی اور ہر ممکن مدد کریں گے، پبلک سیکٹر یونیورسٹیز میں نشستیں کم ہونے کی وجہ سے طلبا کی بہت بڑی تعداد داخلوں سے محروم رہ جاتی ہے، ہماری کوششوں سے قائم ہونے والے پرائیویٹ تعلیمی ادارے اور یونیورسٹیاں اس خلا کو پر کرنے میں اپنا کردار ادا کریں گی۔

دوسری جانب پروفیسر ڈاکٹر چوہدری عبدالرحمان نے اسپیکر پنجاب اسمبلی کا شکریہ ادا کرتے ہوئے کہا کہ چوہدری پرویزالہٰی کا وزارت اعلیٰ کا دور ہو یا بطور اسپیکر انہوں نے ہمیشہ تعلیمی اداروں کی سرپرستی کی ہے۔

انہوں نے مزید کہا کہ چوہدری پرویزالہٰی کی تعلیم دوست پالیسیوں خصوصاً پڑھا لکھا پنجاب کو عالمی سطح پر پذیرائی حاصل ہوئی ہے۔