چیئرمین سینیٹ صادق سنجرانی نے ایران کے سفیر سید محمد علی حسینی سے پارلیمنٹ ہاؤس میں ملاقات کی ہے۔

تفصیلات کے مطابق ملاقات میں دو طرفہ تعلقات اور  باہمی دلچسپی کے امور پر تبادلہ خیال کیا گیا ہے، ملاقات میں مکران ڈویژن اور گوادر کو ایران کی جانب سے بجلی کی فراہمی منقطع ہونے کا معاملہ بھی زیر غور آیا ہے۔

 ذرائع نے بتایا ہے کہ ملاقات میں چیئرمین سینیٹ نے ایران کی حکومت کا گوادر اور مکران ڈویژن کی بجلی بحال کرنے پر شکریہ ادا کیا ہے۔

ملاقات میں چیئرمین سینیٹ نے کہا ہے کہ بجلی کی بندش سے علاقے کے عوام کو مشکلات کا سامنا تھا۔

ذرائع نے بتایا ہے کہ چیئرمین سینیٹ نے دفاعی سطح پر تعاون کو بھی مثالی قرار دیا ہے اور پاکستان اور ایران کے مابین پارلیمانی روابط، تجارتی تعاون اور دوطرفہ اقتصادی تعلقات کے استحکام پر زور دیا ہے۔

 صادق سنجرانی نے ملاقات میں مزید کہا ہے کہ پاکستان اور ایران خطے کی ترقی اور خوشحالی کے خواب کو شرمندہ تعبیر کرنے کیلئے کوشاں ہیں، دونوں ملکوں کی مذہبی، ثقافتی اور سماجی مماثلتیں دو طرفہ تعاون کو فروغ دینے کیلئے مستحکم بنیادیں فراہم کرتی ہیں، خواہش ہے کہ ان تعلقات کو سیاسی، سماجی اور اقتصادی سطح پر مزید مستحکم کیا جائے۔