مصطفی کمال کا کہنا ہے کہ صنعتی زونز میں پانی کی کمی سے صنعتیں بند ہورہی ہیں۔

تفصیلات کے مطابق پاک سرزمین پارٹی (پی ایس پی) کے چئیرمین مصطفی کمال نے میڈیا سے گفتگو کرتے ہوئے کہا ہے کہ کراچی میں ایک لاوا پک رہا ہے، سندھ کے شہری علاقوں میں مایوسی انتہا پر پہنچ چکی ہے، کراچی کو آج پینے کا پانی میسر نہیں ہے، 70 فیصد ریوینیو کما کر دینے والے شہر کے ساتھ ایسا ہورہا ہے۔

ان کا کہنا ہے کہ  13 برسوں سے سندھ میں پیپلز پارٹی کی حکومت ہے، گزشتہ  3 برسوں میں بیڈ گورنس انتہا پر پہنچ چکی ہے۔

پاک سرزمین پارٹی کے چئیرمین نے کہا ہے کہ ڈھائی لاکھ لوگوں کو سرکاری نوکری دی گئی ہے اس میں بھی جعلی ڈومیسائل والے شامل ہیں، کورونا ایس او پیز کے حوالے سے ہزاروں لوگوں کی نوکریاں ختم ہوگئی ہیں، لگتا ہے مذموم پلاننگ کے تحت سندھ کو تباہ کیا جارہا ہے۔

مصطفی کمال کا کہنا ہے کہ وفاق میں تحریک انصاف کی حکومت کے لئے پیپلز پارٹی کا ساتھ ضروری ہے، اس شہر میں امن کے لئے ہم نے قربانیاں دی ہیں، شہر کے مینڈیٹ کا دعوی کرنے والے کچھ عرصہ قبل الیکشن میں پولنگ ایجنٹس تک نہیں بٹھا سکتے تھے، ہم را کے ایجنٹوں سے نہیں ڈرے، سندھ کو پیپلز پارٹی نے جاگیر بنا لیا ہے۔

انھوں نے کہا ہے کہ بلدیاتی انتخابات کروانے کے بجائے ایڈمنسٹریٹر کے ذریعہ اربوں روپے خرچ کئے گئے تھے، کہیں نظر نہیں آیا کہ اربوں روپے کہاں خرچ ہوئے۔

ان کا کہنا ہے کہ پی ایس پی نے پانچ برسوں میں بہت سی کامیابیاں حاصل کیں ہیں، تحریک انصاف اور پیپلز پارٹی جرائم میں پارٹنر ہیں، ہمارے پاس پیسے دے کر ووٹ خریدنے کی استطاعت نہیں ہے، کے فور منصوبہ وفاق نے لے لیا ہے  اس پر ایک انچ کام نہیں ہوا ہے، گرین لائن منصوبے کا انفرا سٹرکچر نواز شریف کے دور میں مکمل ہوگیا تھا۔

پاک سرزمین پارٹی کے چئیرمین نے مزید کہا ہے کہ ہم نے شہر کی تاریخ کی سب سے بڑی تجاوزات ختم کرکے لیاری ایکپریس وے بنائی ہے، اگر مسئلے کو حل نہیں کیا گیا تو ہٹائے گئے لوگ شہر بھی میں بس جائیں گے۔