پیپلزپارٹی کی مرکزی سیکرٹری اطلاعات نفیسہ شاہ نے کہا کہ کشمیر انتخابات کی موجودہ صورتحال کی ذمہ دار براہ راست تحریک انصاف ہے۔

تفصیلات کے مطابق پیپلزپارٹی کی مرکزی سیکرٹری اطلاعات نفیسہ شاہ نے اپنے بیان میں کہا کہ تحریک انصاف نے ریاستی مشینری کے استعمال کے ذریعے آزاد کشمیر انتخابات کو متنازعہ بنا دیا ہے۔

انہوں نے کہا کہ انتخابات کے دوران فائرنگ، پولنگ اسٹیشنز اکھاڑ کر تحریک انصاف نے خونی دھاندلی کرنے کی کوشش کی ہے، پیپلزپارٹی کے وکلاء کئیں گھنٹوں سے شکایات لیکر سیکرٹری الیکشن کمیشن کے دفتر کے باہر کھڑے ہیں مگر الیکشن کمیشن کے افسران، عملہ دفاتر اور سینٹرل کنٹرول روم میں دستیاب نہیں ہیں۔

نفیسہ شاہ نے کہا کہ آزاد کشمیر الیکشن کمیشن کی یہ صورتحال انتہائی افسوسناک ہے جو کئیں سوالات کو جنم دیتی ہے، پیپلزپارٹی ان خدشات کا پہلے دن سے اظہار کرتی رہی لیکن الیکشن کمیشن نے نوٹس تک نہیں لیا، ڈپٹی اسپیکر قاسم سوری، علی محمد خان اور علی امین گنڈاپور کی پولنگ اسٹیشنز پر موجودگی نے انتخابی عمل پر سوالیہ نشان اٹھا دیا ہے۔

انہوں نے کہا کہ وفاقی وزرا اور ڈپٹی اسپیکر نے الیکشن کمیشن کے احکامات کو ہوا میں اڑا دیا، آزاد کشمیر کے انتخابات کی موجودہ صورتحال الیکشن کمیشن کے آئینی کردار پر بھی ایک بہت بڑا سوالیہ نشان ہے، پیپلز پارٹی نے تحریری طور پر تمام خدشات اور صورتحال سے الیکشن کمیشن کو آگاہ کردیا ہے۔

پیپلزپارٹی کی مرکزی سیکرٹری اطلاعات نفیسہ شاہ نے مزید کہا کہ الیکشن کمیشن امیدواران کو تحفظ اور انتخابی عمل کو شفاف بنانے کے لئے آئینی کردار ادا کرے، آزاد کشمیر انتخابات میں پیپلزپارٹی کے امیدواران پر سرعام فائرنگ تحریک انصاف کی کھلم کھلا گنڈا گردی ہے، فائرنگ کے نتیجے میں ہونے والی ہلاکتوں کا مقدمہ تحریک انصاف کے رہنماؤں کے خلاف درج کیا جائے۔