اسٹیل ٹاون نیشنل ہائی وے پر مویشی منڈی کے تاجر سے 64 لاکھ ڈکیتی کی واردات کا ڈراپ سین ہوگیا۔

 تفصیلات کے مطابق ایس ایچ او تھانہ اسٹیل ٹاٶن ممتاز مروت نے اپنے ایک بیان میں کہا کہ پولیس نے تفتیش کی تو معلوم ہوا کہ تاجر نثار پولیس کو بے وقوف بناکر ڈکیتی کا مقدمہ درج کرانا چاہتا تھا۔ تاجر نثار نے ون فائیو پر اطلاع دی تھی کہ وہ بھینس کالونی سے فیملی کے ہمراہ کار پر آرہا تھا کہ اسی دوران گاڑی میں سوار مسلح ملزمان نے 64 لاکھ 70 ہزار روپے اسلحے کے زور پر لوٹ لئے اور لوٹ کر فرار ہوگئے۔

ایس ایچ او تھانہ اسٹیل ٹاٶن نے کہا کہ رات گئے تک واردات سے متعلق تفتیش کی تو معاملہ مشکوک لگا جس پر پولیس نے تاجر نثار کے آبائی علاقے لاڑکانہ رابطہ کیا، تو معلوم ہوا کہ تاجر لاڑکانہ میں اس ہی طرح کا ایک جھوٹا مقدمہ درج کراچکا ہے تاہم تاجر منگل کی صبح تھانے آیا اور کہا کہ اسکی مذکورہ رقم بچ گئی ہے ملزمان غلطی سے کپڑوں سے بھرا تھیلا لیکر فرار ہوگئے جبکہ رقم سے بھرا تھیلا چھوڑ گئے۔

ممتاز مروت نے یہ بھی کہا کہ شبہ ہے کہ تاجر نثار کو لاڑکانہ میں جس کو رقم دینی تھی، اسے ڈکیتی کا رنگ دے کر رقم ہڑپ کرنے کے چکر میں تھا لیکن پولیس نے باریک بینی سے تفتیش کی تو تاجر کا بیان تبدیل ہوگیا۔

ایس ایچ او تھانہ اسٹیل ٹاٶن پولیس نے مزید کہا کہ تاہم پولیس نے نثار کی مدعیت میں ڈکیتی کی کوشش کا مقدمہ درج کیا اور تفتیش شروع کردی ہے اگر تفتیش کے دوران یہ ثابت ہوگیا کہ مدعی جھوٹا مقدمہ درج کرانا چاہتا تھا تو پولیس سرکاری مدعیت میں اسکے خلاف مقدمہ درج کریگی۔